魚缸博客一向寫細價股多過大價股，事關細價股通常多啲騎哩嘢寫，股價隨時飛天遁地無所不能。好似今日咁，就有隻股仔復牌即升1.3倍。股價升咁多，但成交金額就明顯跟唔上，開市一個鐘成交得果20幾萬銀，名副其實乾升。
不過，今日博客要講嘅唔係呢隻股仔，而係市值達千億嘅比亞迪(01211)。根據聯交所股權披露顯示，股神巴菲特旗下巴郡於上個禮拜二(16號)再減持比亞迪139.55萬股H股，每股平均價246.96銀，套現約3.45億銀，持股量由5.06%降至4.94%。巴郡對上兩次減持分別喺6月19號，減持202萬股，每股作價234.57銀；以及喺6月11號，減持135萬股，每股作價230.46銀。
比亞迪股價一路升，股神就一路出貨，難免動搖散戶信心。今日股神再次出貨嘅消息出來後，比亞迪捱沽，股價跌緊3%左右，認真運滯！究竟比亞迪股價短期仲有無得升？又唔係無嘅，不過升上去預咗又被人沽。其實，股神持續減持，當然有佢嘅原因。
電動車行業經過幾年高速增長後，各大車企產能大幅上升，營收亦大增。以比亞迪為例，2023年營收高達6023億人仔，比2020年約1535億人仔，升咗接近3倍。之所以高速增長，離唔開政府扶持。但扶持又離唔開真金白銀，但呢幾年，地方政府因為賣地收入大不如前，能否持續給予支持係一個疑問。依家各大車企產能大增後，對內難免要埋身肉搏－減價，對外又要面對額外入口關稅，就算銷量保持增長，但毛利難免受損。要避開呢啲關稅，喺其他國家設廠，涉及嘅投資又係一大筆。試問喺咁樣嘅環境下，電動車企嘅發展空間仲有幾大？當然，博客又唔係危言聳聽，講到電動車行業好似世界末日咁，而係話再上升嘅空間愈來愈小。
睇返比亞迪股價，自2月低位164.4銀附近開始上升，到上個禮拜一（15號），股價一度高見249.6銀，累積升幅接近52%。依家股神接連出貨，股價梗係受壓，買就梗係制唔過，畀我有貨都會等到上返245銀樓上沽埋一份！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【慎防受騙】偽冒《經濟通》投資群組頻現，切勿誤信騙徒，如有疑問，請循官方渠道查詢► 了解詳情
41,352.99
17,838.39
