美國前總統兼本屆總統候選人特朗普,東岸時間7月13日喺賓夕法尼亞州出席拉票活動時遭遇槍擊,右邊臉部受傷。事件震驚全球,「特朗普」一詞一躍成為各地網民熱搜詞。經過槍擊事件,特朗普重入白宮嘅機會高唱入雲。同特朗普相關嘅中文熱搜詞,例如「特朗普股票」、「特朗普股市」、「特朗普當選」,甚至「特朗普八字」等大行其道,魚缸更加出現「特朗普概念股」。
講起特朗普概念股,大家可能會諗起同佢有關嘅股份,例如特朗普持有股份嘅特朗普媒體科技(DJT)等,甚至表明撐特朗普嘅馬斯克,佢持有股份嘅特斯拉如果被列為特朗普概念股都可以理解。但查實,特朗普概念股多到你無法想象。就連隔住浩瀚太平洋嘅內地A股,居然都出現特朗普概念股,真係有啲匪夷所思!
話說A股有家發展3D人臉辨識,名叫川大智勝嘅企業喺特朗普遇襲後首個交易日(15日),股價就直接升停板。呢家企業當然同特朗普毫無關係,只因個名有個川字(特朗普內地譯名叫川普),股價就係咁飛升。內地股民認為,川大智勝有「川普智謀取勝」嘅含義,因此受到熱捧。如果你以為呢次升停板只係一次巧合嘅話,咁你就錯啦!早喺上月美國總統候選人嘅首場辯論大會,外界普遍認為特朗普表現勝過拜登時,川大智勝股價同樣升停板。
一次係巧合,兩次係巧合,再多幾次就唔係巧合啦。據聞自2016年特朗普上台後,每當有特朗普相關嘅重大消息時,川大智勝股價都會跟上跟落。可想而知,川大智勝早已經係元祖級嘅「特朗普概念股」。原來「特朗普概念股」呢樣嘢8年前已經喺A股出現,只係大家唔知道。
根據咁嘅邏輯,港股都可以發現「特朗普概念股」,有家上市企業名叫川控股(01420)。按照內地股民嘅演繹法,應該聯想到係「川普控制嘅股份」,或者至少聯想到川普係大股東嘅企業。股價呢排應該大升特升先係,點解呢幾日完全唔郁?怪只怪香港股民太理性,又無咁好幻想力!所以,川控股喺特朗普遇襲後,唔單止股價無得升,甚至幾日都無開齋,連續4個交易日一單都無成交過。唔知公司有無後悔嚟香港上市,而唔係去A股上市?如果唔係,呢幾日可能日日升停板都唔定。請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】本港無人駕駛自動車最快本月底試運,你會否乘坐?► 立即投票