《魚缸博客》金價近期屢創新高，金礦股齊漲，周大福有無得跟升？

　　《魚缸博客》金價近期屢創新高，上周升至每盎司２４３１美元的紀錄高位，盤中幾隻金礦
股亦趁勢抽升。從２月１５日至今，以近期最高點計算，紫金（０２８９９）兩個多月來累積逾
６成，招金（０１８１８）亦升逾一倍，最勁嘅靈寶黃金（０３３３０）更加升１﹒７倍。
　　過往每逢金價上升，除了利好一眾金礦股之外，周大福（０１９２９）亦多少受惠，皆因會
多咗人買金。尤其是內地大媽，見到金價升，都會急急腳走去金舖入返多少貨。但呢種情況而家
好似有啲唔同，由於內地經濟放緩，買嘢無以前咁熱衷，加上金價高企，對於大媽來講可能少咗
投資吸引力，所以就係周大福股價近期不升反跌嘅原因。
　　上周五（１２日）收市後，集團公布今年首季零售值按年增長１２﹒４％。有增長本來係好
事，但今日股價照樣低開半成，可想而知，市場唔多接受。又係嘅，舊年年頭內地話就話復常，
但社會消費活動仲未完全回復正常，基數又唔係高。喺咁嘅情況下，都係得一成二嘅增長，的確
有啲令人擔心。再睇真啲，首季內地同店銷售下跌２﹒７％，同店銷量下跌６﹒９％；內地淨關
閉８９個珠寶零售點，情況確實唔樂觀。
　　而家中東局勢進一步緊張，未知日後會唔會推高金價。但就算金價再升，預料難以對周大福
帶來好處。反而一旦局勢惡化，對全球經濟帶來負面影響，對奢侈品零售商嘅周大福可能更不利
。所以投資者就算要博反彈，都要小心部署。一旦跌穿舊年１２月低位９﹒９１元，走勢可能會
更差。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。