《小傳日記》協鑫科技回購計劃公然跳票，原來早有前科！

　　《小傳日記》上周五盤後，協鑫科技（０３８００）公布取消今年宣布嘅６﹒８億人仔嘅股
份回購註銷計劃，有投資者喺炒股社交平台直呼「老千」，今日股價一度跌超３％創埋月低添。
公司嘅行動固然就食相可憎啦，不過睇番回購記錄都知公司只係回購咗２４００萬銀，規模只係
整個回購計劃嘅３﹒５％，要喺未來１０個交易日內豪斥超過６億銀搞回購都係天荒夜談，跳票
就係意料中事。
　
　　公告入面話，公司係因為而家光伏行業仲處於過度競爭嘅狀況，公司要保障自身經營嘅穩定
性，應對未來嘅不確定性。但其實呢，矽價長期低位運行都唔係一日半日嘅事啦，行業產能過剩
早就人盡皆知，如果公司真係因為要節省現金而拒絕回購，咁你不如從一開始就唔好提要回購啦
，更何況，如果光伏行業係景氣嘅，你都唔需要回購自家股票挽回孖屐信心啦，呢個理由試問邊
個小股東可以接受？
　
　　並且，協鑫科技唔講口齒嘅行為已經唔係第一次啦。２０２２年公司公布，實控人朱共山家
族話會以每股唔低過４﹒２元增持公司嘅股票。公司話，朱氏家族信託已經同協鑫科技傾過，打
算透過佢哋嘅附屬公司同其他投資機構認購公司發行嘅可轉債，本金大概係８億到１０億美元，
如果以１０億美元嚟計嘅話，如果可轉債全經轉換，朱氏家族最多就會增持１８﹒５７億股。但
實際上，朱氏家族喺２０２２年７月增持咗１０００萬股之後，就冇曬下文。
　
　　光伏行業本身就陷入寒冬，全行業虧損不斷加劇，協鑫科技呢個時候取消回購，唔少投資者
都懷疑公司實際經營狀況比披露嘅仲要差，之前嘅回購計劃只係想哄住股價唔好跌得太難睇，引
多啲人埋嚟買股票。
　
　　就算協鑫科技靠呢啲小把戲暫時托住股價，又有咩用呢？更何況你都托唔住，公司聲稱大股
東大手筆增持嗰陣，股價喺３蚊樓上，而家就喺１蚊上下徘徊。一家市佔率超過１５％嘅新能源
帝國，又何必喺資本市場上玩財技失口齒呢，你係咩股就會吸引咩股東，垃圾股只會吸引到只做
短線交易嘅散兵游勇，有價值嘅長線投資者睇到你嘅不良記錄，又敢唔敢沾手呢，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。