《魚缸博客》美國時間3月18日喺加州聖約瑟舉行嘅英偉達GTC開發者大會上,英偉達
宣布同多家中國車企加強合作,除咗比亞迪(01211)之外,仲有小鵬汽車(09868)
同廣汽埃安旗下嘅Hyper品牌。之前,吉利(00175)旗下嘅極氪同理想汽車
(02015)都宣布將會採用英偉達嘅Drive Thor技術。今次英偉達漁翁撒網,盡
攬內地電動車企,幾乎滴水不漏,可想而知,英偉達有幾睇重內地嘅龐大市場。所以,今次嘅合
作,無論對英偉達,定係對一眾車企嚟講都係好事,名副其實雙贏。
其實英偉達同一眾車企之間嘅關係,講到底不過係供應商同客戶之間嘅關係,但用到「合作
」二字,即刻高檔咗好多。不過,就算唔係合作,只係採用英偉達嘅DriveThor技術,
都足以增強消費者信心。何況英偉達而家炙手可熱,難怪一眾車企趨之若鶩。特別係對於一啲仲
係蝕緊錢嘅初創車企來講,英偉達嘅加持,即時好似打咗一支強心針咁。小鵬汽車亦係英偉達嘅
「合作」夥伴之一,能否靠今次合作翻身?恐怕有啲難度。
首先,今次合作嘅同行太多,當你嘅優勢人哋都有嘅時候,呢個優勢就唔再係優勢。一部車
涉及零部件太多,淨係軟件技術仲係未夠,要藉此翻身談何容易?
小鵬汽車尋日收市後公布業績,截至去年12月31日止年度,虧損擴大至103﹒76億
元人民幣,2022年同期為虧損91﹒39億元人民幣。2023年總收入306﹒8億元人
民幣,升14﹒2%。全年汽車交付量約14﹒16萬輛,按年上升17﹒3%。不過,根據內
地2023年統計,去年嘅新能源車銷量按年上升38﹒4%,小鵬嘅升幅明顯落後大市,可想
而知發展道路並唔暢順。短炒或者可以,長線真係要諗清楚先好。(vs)
《編者按》本欄搜羅即市傳聞,惟消息未經證實,《經濟通》亦不保證內容之準確性。
WoW WoW星期三:健康網購產品低至$99!(只限今天)► 火速行動