《小傳日記》晶片股又升一浸！孖屐對中興新機勁有信「芯」！

　　《小傳日記》今日魚缸單日轉向，都係多得隻理想（０２０１５），出咗份堪比拼多多季績
咁震撼嘅２０２３全年業績，經調整純利由２０２２年嘅４１００萬人仔升到去１２１億人仔，
收入過千億去１２３８億人仔，於是全日係咁升，最多勁飆兩成六，貢獻恒指差唔多８０點升幅
，真係升市最大功臣！
　　而今日另一隻功臣就係中芯（００９８１），全日最多升一成二，雖然貢獻點數唔夠理想多
，不過都係全日第二佳表現藍籌。今日晶片股普遍爆升，華虹（０１３４７）升７％有多，復旦
（０１３８５）勁飆兩成三，晶門（０２８７８）升９％。自強行情再起，皆因同樣被美國封殺
嘅中興（００７６３）今日出新手機，喺今日嘅ＭＷＣ大會（世界移動通信大會）上面，發布咗
公司新一隻摺ｍｏｎ手機ｎｕｂｉａ　Ｆｌｉｐ，仲要係５Ｇ機，所以就令晶片股再次借題發揮
炒起。
　　其實今部ｎｕｂｉａ　Ｆｌｉｐ唔可以話係中興最新機，其實之前早就喺日本出過同款機，
日本名就叫Ｌｉｂｅｒｏ　Ｆｌｉｐ，當時定價４２０銀美金，但係改過名就有新格局，賣貴百
幾銀美金，盛惠５９９銀美金。
　　ｎｕｂｉａ　Ｆｌｉｐ今日ＭＷＣ上面曝光之後，已經吸引唔少科技行家試新機。有唔少傳
媒試完機之後，都發覺規格大致上同之前喺日本出嘅Ｌｉｂｅｒｏ　Ｆｌｉｐ差唔多，
ｓｅｒｖｅｒ用高通Ｓ１　Ｇｅｎ　７，最大８ＧＢ　ＲＡＭ＋２５６ＧＢ。
　　之前Ｌｉｂｅｒｏ　Ｆｌｉｐ出嘅時候，就被譽為係最平摺機，除開大約３２００銀港紙就
可以買到摺ｍｏｎ，但係國際版貴咁多，有科技行家就表明平係Ｌｉｂｅｒｏ╱ｎｕｂｉａ嘅最
大優點，一貴咗就即刻無咁吸引，其他性能都只係人有我有，未算有好大亮點。
　　雖然科技達人覺得ｎｕｂｉａ無乜特別，但係中興可以喺國際場合出到５Ｇ機，絕對係振奮
人民感情嘅一刻。早個幾禮拜美國先又再公布打壓中芯，但係如今嘅前打壓主要對中興就繼華為
之後再出５Ｇ機，可以話係美國越打就越升，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。