《魚缸博客》恒指經過上個禮拜最後兩個交易日合共急升821點後,今日有啲腳軟。今早
低開近百點後,由於內地公布嘅第二季國內生產總值低於預期,恒指藉勢向下,暫時跌緊將近二
百點。不過,跌市之下一樣有奇葩,金斯瑞生物科技(01548)逆市飆升超過兩成,最高甚
至升近三成三,以一隻市值過百億嘅股票來講,升幅之大絕對稱得上係奇葩。
早喺6月1日,有報道指美國眾議院5月30日去信聯邦調查局及國家情報總監辦公室,要
求就金斯瑞生物科技同旗下三家子公司是否同中國官方有關連作說明。消息傳出後,金斯瑞股價
之後嘅交易日(6月3日)一度急挫25﹒7%。雖然之後跌幅收窄,但收市仍跌17﹒7%至
8﹒23蚊。之後嘅個幾月,金斯瑞股價反覆靠穩。直至上個禮拜,股價開始慢慢回升。無獨有
偶,上個禮拜五(7月12日)股價收市回升至10蚊,剛好係5月31日受美國眾議院展開調
查前嘅收市價,可以講市場已經消化曬呢單不利消息。
公司今日澄清,話並無受到任何政府控制,未來將會積極同上述委員會接洽,並幫助對方增
進對公司業務了解咁話。不過,公司股價既然已經升返去之前美國眾議院展開調查前,就算今日
澄清都應該無關痛癢先係呀,咁今日金斯瑞升啲乜?原來傳出話旗下美國上市傳奇生物
(LEGN)據報近日收到併購邀約。只係邀約,都未講收購乜嘢公司,乜嘢價格,對公司有乜
嘢好處,就升兩成幾?如果第日收購成功,唔知到時股價又會升幾多?
金斯瑞過去連續五年虧損,舊年(2023年)虧損額剛好同2019年接近,都係蝕9千
幾萬美金。不過,期內營收就由2﹒73億美金升至8﹒39億美金,升咗兩倍幾。升兩倍幾都
一樣蝕咁多。如果營收下跌又會點?或者要營收升到幾多先有機會轉賺?博客真係有好多疑問。
不過,如果唔用一般投資價值法去衡量,純粹以投機心態去買賣又如何?翻睇2021年金斯瑞
走勢,股價由1月底不足10蚊升至7月底43﹒4蚊,短短半年升咗3倍。唔好唔記得,呢短
時間係公布2020年業績前後,該年虧蝕超過2億美金,虧蝕金額比2019年擴大一倍,可
想而知,該股價走勢未必與業績有關。今次由10蚊便再次飆升,會唔會好似2021年咁又升
幾倍?博客真係唔敢講,但相信能承受高風險嘅投資者,或者小注入市比較適合。(vs)
《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇