《小傳日記》花旗科企謀重啟核電廠，ＡＩ當道環保分子要讓路？

　　《小傳日記》喺商界行走要敢想敢拼，有啲嘢唔試過真係唔知，就好似中國奧園
（０３８８３）咁，你知我知內房企業呢期衰到貼地，但偏偏就俾奧園創辦人郭梓文搵到一個中
東土豪接貨，賣咗超過６億股俾對方，讓出大股東寶座。通告無講到售價，但畀著我就幾賤都願
意賣啦！雖然公司喺今年３月先完成境外債務重組，但又唔代表唔駛還，只要內地一手樓市場繼
續頹落去，公司流動性總有一日都係會重新乾塘，公司截至今年６月底資產總值１８８６億元人
仔，但單係流動負債就已經高達１６４６﹒７億元人仔，計埋非流動負債就算得上資不抵債，中
東土豪呢單刁認真令人睇唔透！
　　行業周期真係日異月殊，內房佬由有錢土豪變山窮水盡，反過來核電佬常年因環保議題備受
攻擊，點知卻因為ＡＩ發展而搭上順風車！全球資本做晒ＡＩ玩家，你練我練大家一齊練，就似
係２１世紀嘅「軍備競賽」，咁就會衍生一個好現實嘅問題：唔夠電。究竟喺邊度可以搵到穩定
可靠嘅電力呢，核電廠睇嚟係最「眉清目秀」嘅選項。
　　美國聯合能源公司（ＣＥＧ）上周五（２０日）公布驚天大刁，話公司與微軟簽署一項為期
２０年嘅協議，會重啟三哩島嘅一座核反應堆，為微軟嘅ＡＩ數據中心供電。ＣＥＧ預期，花旗
國核能管理委員會（ＮＲＣ）將於２０２７年完成評估程序，通過嘅話２０２８年可以上線。
　　要知道三哩島核電廠曾經喺１９７９年發生過核洩漏，係花旗國史上最嚴重嘅核災，有公司
打算重啟當地核電廠，意義實在非比尋常，甚至有人提出「核電復興」係現在進行式！消息一出
，ＣＥＧ當日股價跳漲２２巴仙，連帶鈾ＥＴＦ一同上揚，至於香江核電股都要炒埋一份，中廣
核礦業（０１１６４）升８巴仙，中廣核電（０１８１６）升半成，中廣核能（０１８１１）升
３巴仙。
　　不過孖屐又唔好太興奮，事關重啟核電廠可想而知有幾困難，就以重啟三哩島核電廠為例，
公司要分別取得聯邦政府、州政府及地方政府嘅批准，拖你三年五載都唔奇怪，如果有人喺博物
館呀名勝古蹟呀搞下破壞，真係等到蚊瞓。
　　至於神州發展核電一向就無咩阻力嘅，當局喺２０２２年和２０２３年分別核准新造１０台
核電機組添，中廣核集團副總經理施兵曾經公開講過，神州核電裝機已超過１億千瓦，今年會成
為全球第一核電大國。從來無問題，從來唔需要解決問題，神州核電股唯有凑吓熱鬧炒一炒咁囉
，請請！
　　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。