《小傳日記》自「新東方在線」改名成東方甄選(01797)以來,直播帶貨就成為公司
命脈,直播靠把口,但係近年東方甄屢屢出現講錯嘢風波,搞到股價一路仆直,到今日再跌差唔
多一成,跌穿15銀之餘,已經返到去2022年宣布轉型做直播嗰陣嘅水位,近乎打回原形。
其實今個月以來東方甄選就一直向下,事關月初俞敏洪客串行家直播期間,被問到想同佢請
教「直播帶貨經驗」,身為老闆嘅俞敏洪就「自謙」咁話:「東方甄選現在做得亂七八糟,沒有
任何向你提建議的本領」,呢句即時引起瘋傳,雖然東方甄選的確係有啲亂七八糟,但「官方吐
槽最為致命」,身為老闆自認亂七八糟,實在令人失望,所以上個禮拜一東方甄選已經急插一成
。
事件發酵幾日之後,到上個禮拜五,俞敏洪又使出看家本領,再次發布公開信道歉。信中俞
敏洪向客戶、股東同投資者道歉,提到「東方甄選亂七八糟」只係朋友之間嘅謙虛表達,要為咁
唔嚴謹嘅表達道歉,「儘管東方甄選今天是不完美的,但這種不完美,恰恰是我們的激勵和動力
,也是走向更好發展的起點」。
但俞老講錯嘢風波落幕兩日之後,輪到「高級合伙人」董宇輝禮拜日客串另一個節目,就提
到自己對於而家嘅地位都非常有壓力,帶貨至今都係唔享受,雖然係有支撐意義,但就無喜悅。
佢又話,因為直播而令到父母長期被騷擾,成日有商家聯絡唔到佢就去搵佢喺農村老家嘅父母,
令到佢非常內疚,甚至想索性唔撈!佢又提到因為咁成日都訓唔好,食安眠藥都未必一覺訓天光
。
俞敏洪講過,過去呢一年來所承受嘅謾罵、指責同侮辱已經比起100世嘅總量都唔止,雖
然講得誇張,但都所言非虛。過去呢一年幾乎每次風波都係俞敏洪道歉作結:俞敏洪講錯嘢,俞
敏洪道歉;之前孫東旭講錯嘢,俞敏洪道歉;董宇輝講錯嘢,都係俞敏洪道歉,要講到呢一年來
出道歉聲明最多嘅上市公司老闆都非俞敏洪莫屬。由此俞敏洪壓力大,董宇輝更加壓力大,可能
唔覺意講一句又會令俞敏洪要道歉,可想而知東方甄選「成也講嘢,敗也講嘢」,講又死唔講又
死。
其實東方甄選口舌是非鑊鑊新鮮,實際上已經唔係單一事件,根本上係管理問題。呢一年來
孖屐都已經發現東方甄選過份依賴董宇輝,即使董宇輝繼續處於東方甄選體系之中,但東方甄選
都消化唔切董宇輝帶來嘅高流量,造成如今董宇輝個人直播號「與輝同行」嘅銷售額仲高過東方
甄選,令東方甄選都不得不依賴董宇輝。而與其話東方甄選依賴董宇輝,東方甄選更加依賴流量
,因此每一次出現風波,流量一跌就會重挫股價。直播股依賴高流量,但流量變化瞬息萬變,而
呢一個亦正係東方甄選股價波動嘅核心原因,唔解決對流量嘅依賴問題,東方甄選只會不停波動
,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
WoW WoW星期三:健康網購產品低至$99!(只限今天)► 火速行動