按盤價 
《小傳日記》人行繼降準之後再出重招谷大市，噚日宣布五年期ＬＰＲ大減２５點子，創
ＬＰＲ史上最大單次減幅，雖然魚缸慢咗半拍，不過今日都叫升過５００點，成交又上返千二億
，都算係咁。
大升市下海底撈（０６８６２）都同沐恩澤，出盈喜預上年賺唔少過４４億人仔，按年賺多
一倍七之餘，比起疫情前嘅２０１９年度更加賺多七成有多。賺多咁多，不過今朝一開就要跌，
好在後尾魚缸升足５００點先拉返，結果今日都升住收場。
魚缸有魚缸沽貨，但係海底撈成績表計落真係有交代，仲賺得多過疫情前。海底撈就話，賺
多咗係因翻枱率提高以及營運效率改善，而且下半年係賺得多過上半年。只係一條盈喜，海底撈
只係用一句「營運效率改善」，唔通真係「科目三」嘅功勞？
事實上「科目三」並唔係海底撈所創，但係海底撈嘅活用程度已經令佢堪比海底撈主題曲。
「科目三」原本係廣西嘅網絡歌曲，係唱「廣西人必備三項技能」。不過隻歌係唱咩唔重要，最
重要係個ｂｅａｔ夠洗腦，而且隻舞嘅搖擺動作夠曬魔性，好容易就令人爭著拍片「蹭流量」。
其中喺山東嘅一位海底撈店員都跟跳，仲喺舖頭入面表演，令到其他店員跟著跳，最初可能係好
玩，但係食客睇完舞會畀多啲ｔｉｐｓ，就令到店員有更大誘因跳舞。
而海底撈都有好好把握個勢，有傳新入職員工如果識跳「科目三」係可以加人工，又有傳識
跳「科目三」仲成為員工每月評分嘅一部分。雖然官方無講明，但識跳舞同唔識跳舞嘅員工都爭
住練，好難話唔係有錢使得鬼推磨，海底撈好有可能都有喺背後幫手谷呢一波宣傳。
但其實科目三上年１１月先開始喺海底撈興起，就算幫盡都係嗰一個幾月，所以海底撈賺多
咗真係未關事。不過海底撈把握呢股熱潮之快都係應記一功嘅公關宣傳，如果唔係有公司方面推
波助瀾，相信都未至於ｈｉｔ成咁，究竟「科目三」有幾幫到手，今年份中期業績就真係睇得到
喇，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】機管局獎勵航空公司增往來香港航線，措施能有效推動航空業復常？► 立即投票
