按盤價 
《小傳日記》美國時而彈出時而彈入真係夠癮，噚日先炒緊無人支持限制生科草案，點知到
今日又話六個支持人頭「真狡猾，老是常出現」，居然會返兜支持返，搞到藥明又再捱沽。兩大
藍籌藥明生物（０２２６９）同藥明康德（０２３５９）今日都要再跌超過７％，雖然跌，但係
都慘唔過半新嘅藥明合聯（０２２６８），今日再跌一成七創新低，跌穿埋反彈前低位，實在令
人慘不忍睹。
六個人頭彈出再彈入，藥明都跟著跌完又升又再跌，忽然縮沙唔支持無講過點解，忽然支持
返無講過點解，難免令人聯想當中究竟涉及幾多操作。有人就統計過呢段時間嘅藥明系ＡＨ股都
有好多「古怪」嘅交易表現，尤其係藥明康德Ａ股嘅「轉融券」，即係沽空之用嘅貨就直頭跟足
走勢。當上月２６號消息流出，康德Ａ嘅轉融券融出數量急增到２３﹒５３萬股，而之後股份就
繼續跌，到３１號轉融券融出數量減到得５萬股多啲，第二日就有短線反彈，但係同時間阿爺嘅
限沽令都出場，暫停借貨沽空。
所以，阿爺將藥明嘅暴跌歸咎有人放大「洋作文」嘅影響都無可厚非，實際上孖屐唔少人都
知道草案通過機會非常細，但係有料當然要發揮佢最大作用，所以一跌就跌得咁甘，當中都有唔
少沽空嘅操作。
但同樣見到，當阿爺限沽令一出，今日藥明再跌嘅跌幅就細得多，唔通真係限沽令有用？但
都係嗰句，唔畀沽空會跌少咗，但唔係唔跌，好似今日咁，六個美國議員撳個掣就可以咁影響市
況，玩殘藥明，就證明ＡＨ場都弱不禁風，係咁易都隊得冧，唔好講話藥明系，而家入市都真係
要好小心，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【親子溝通】怪獸家長原來都有呢啲通病！相處有一件事切忌？► 即睇
