《魚缸博客》恒指延續上周升勢，暫時升緊２００幾點，雖然盤中一度輕微倒跌，但好快又
升返，可謂有驚無險。其實又唔使咁擔心，事關Ａ股今日仲係國慶假期休市，聽日首日復市預計
點都會好好睇睇嘅。有人甚至豪言，聽日Ａ股開市即收工，即係開市就升停，雖然誇張啲，不過
代表大家都預計而家個市升勢未完。
近期股市暢旺，股價一日升幾十個巴仙嘅股份一啲都唔罕見，只要係國策利好嘅板塊，例如
早排細價內房股，唔少都試過一日升一倍，但今日最威要數腦洞科技（０２２０３），股價竟然
無端端升近６倍，高位見０﹒９３銀，為兩年多以來最高。
集團最近無咩大事公布，都係買下股票賣下股票嗰啲囉，但今日股價升咁多係真係有啲莫名
其妙。睇返公司業績，自２０２０年以來，除咗２０２１嗰年營收超過３億銀之外，其餘保持年
年２億幾銀。不過，今年保唔保得住２億銀就難講啦，皆因上半年營收大跌三成七只得８３００
萬銀，至於盈利方面，公司年年都蝕錢，平均一年蝕幾千萬銀，唔知單靠投資可唔可以幫助公司
扭虧呢？總而言之，咁嘅牌面，腦洞科技股價一日升幾倍好難有說服力。
有人又問，可能腦洞科技係受國策帶動呢？睇番公司主席係內房企業富力地產
（０２７７７）張力嘅囝囝張量，勉強都算國策受惠股掛，股民開心就好。
腦洞科技算唔算有妖氣，散戶一於少理，只要有錢賺就得啦！查實腦洞科技耐唔耐就飆一次
，遠嘅唔講，今年６月６日收升３８％，５月３０日收升６７％，４月２２日更收升１０８％。
作為小散戶，耐唔耐就可以食一次糊，都咪話唔ｈａｐｐｙ，總好過一啲妖股，長期得個跌字。
仲要時不時又合股又配股，動作多多油水又無得撈，所以，腦洞相對來講算係唔錯。不過今日呢
啲種情況，梗係走為上策。
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》從心理學角度看成癮：點解沉迷？點樣算上癮？一個關鍵指標！邊類人最難以自拔？► 即睇
