《魚缸博客》中國奧園有中東白武士拯救，股價應該有運行？

　　中國奧園(03883)今日股價大幅抽升一倍幾有多，原因有人打救！集團公布，創辦人、執行董事及主席郭梓文所持Ace Rise出售約6.21億股即約16.48%股權予由Mohamed Obaid Ghulam Badakkan Alobeidli所持Multi Gold，MG將成為該集團單一最大股東，而郭梓文持股降至約13.31%，將不再擔任該集團控股股東。
　　呢位Alobeidli係乜水？據了解今年45歲，擔任Magnuvest Investment的總經理，該公司已參與阿聯酋多個房地產項目，中國奧園預期Alobeidli將為公司引入潛在投資人，並為公司帶來更多發展機遇。
　　有中東條「大水喉」加入，可以解讀為白武士進場，雖然中國近年來積極拉攏中東一齊發展，但係咪又代表會俾中東資金進場中國呢？我覺得呢次係一次試金石，中東人對於投資有自己一套價值觀，但係咪可以融入到中國文化就有待觀察，大家都雖然係西方人眼中的「東方」．但個差距都可以好好大。
　　不過點都好，奧園歷史高位去過11蚊幾，今日得返幾毫，如果真係想股價炒上炒落，短期內應該仲會有更大成交，而今日半日成交額都有近7000萬，睇得出市場都幾正面，如果想以小博大，可以買小小，睇到上一蚊先再review吓仲持唔持有啦！
　　

《編者按》本欄搜羅即市傳聞，惟消息未經證實，《經濟通》亦不保證內容之準確性。