RSS訂閱 今朝恒指高開186點，其後升幅持續擴大，最高升到16637，升幅超過400點。今日最省鏡應該係隻開拓藥業(09939)，最高升到1.11銀，較上星期五(19日)收市價漲逾28%。原因係咩，唔睇集團公告你都唔會估到。
原來集團話，佢個GT20029治療男性脫髮中國II期臨床試驗達到主要終點，而且結果具有統計學顯著性同埋臨床意義，且安全性及耐受性良好。仲話基於該項II期臨床試驗嘅結果，將會部署GT20029後續臨床策略，例如開展男性脫髮中國III期臨床試驗，以及美國II期臨床試驗等。此外，集團正準備開展GT20029用於痤瘡治療嘅II期臨床試驗。
由開拓藥業股價因為呢單消息咁樣升法，你就估到「目無髮己」對男人嚟講係幾咁痛苦！由網上搵到今年2月關於男性脫髮嘅資訊顯示，中國有超過兩成男性受脫髮困擾，北京市就佔咗四分之一，而且患者年輕化，壓力係常見原因，另外亦受到環境影響，例如化學生產基地、電腦幅射、手機同無線電訊號，仲有大氣氧化因素。
據國家衛健委調查，2020年中國脫髮人口就達到2.5億，其中男性佔咗1.64億，仲話零零後已加入脫髮大軍！舊年就有統計話，以全球計，捷克全國近43%男性已經或開始脫髮，排名第一。第二位係西班牙；第三係德國，而英、法、意等其他歐洲國家，男性脫髮比例都高過39%！
開拓藥業近年持續虧損，舊年全年仲蝕超過10.6億人仔！股價就由舊年下半年開始一直「潛水」，就算今朝大幅拉升，支陽燭都唔係好明顯。隻股喺2020年5月22日以20.15銀上市，最高見過89銀，以今日高位1.11銀同招股價比較，市值蒸發95%，開拓藥業自己都可謂甩到毛都唔多條，呢鋪仲唔係你脫髮、我脫貧？！中長線可以睇好，現價買得啦！目標上望15銀都唔係好過分啫！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動
