《魚缸博客》尋日恒指收低過１７０００點，你以為準備測試１６８００呢個唱到通街都知
嘅「重要」支持位咩，點知今朝就反高潮，恒指裂口開升４７３點或２﹒８％，報１７４６５。
外圍美股回升應該唔係好關事，照推就係今日李特首將會發表上任後第二份施政報告，各界憧憬
減少甚至撤銷壓抑本港樓價嘅辣招。
不過，依家港股，包括恒指成分股之中大多數都係中資股，同減辣有咩關係？股市就係咁㗎
啦，唔使理佢咩消息，只要係好消息，就可以炒起個股價，至於跟唔跟，閣下自己決定喇！技術
上睇，恒指好大機會已經形成雙底，暫時以１０月上旬高位１８２９０為首個上升目標。
今日講吓百度（０９８８８）。話說１０月１７日，李彥宏喺百度世界２０２３上宣布，「
文心大模型４﹒０」正式發布，並且開啟邀請測試。佢仲話，呢個係迄今為止最強大嘅文心大模
型，基礎模型全面升級，喺理解、生成、邏輯同記憶能力上都有顯著提升。我估今次會對股價會
真正產生支持作用，不過，第時大家就再見唔到關羽騎單車啦！
尋日百度最低跌到１０３銀，落到舊年１２月初以嚟最低水平，日線圖９ＲＳＩ更加跌到
１５，極度超賣，今日借勢反彈，股價高開４﹒４％，報１０８﹒４銀，早段最高上到
１０９﹒５銀。以１０月上旬由最高１３３﹒５銀開始嘅跌浪計，最多累跌３０﹒５銀，同８月
嘅跌幅３５銀有得揮，當時亦係喺９ＲＳＩ跌穿２０之後大反彈，幅度都有２４銀，今轉反彈應
該有機會升近１２４銀先有阻力，咁即係９月下旬同１０月初個低位附近，以現價１０９銀計，
仲有接近１４％潛在升幅。（ｐｃ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
夏日中暑高風險！即睇中暑迷思＋預防措施！► 立即了解
