《小傳日記》是日二十四節氣之中嘅「寒露」，即係天氣進一步轉涼，地面嘅露水都開始結
霜，亦都正好呼應股民今日嘅心，天寒地凍都不及股市令人心寒，Ａ場港股成交額都創歷史新高
，魚缸最終成交６４００億銀，但偏偏係大跌市，呢個紀錄真係令人心酸。
港股升得瘋狂，Ａ場放假期間港股獨自再升２０００幾點，結果北水一返嚟就沽返２０００
幾點，正好打回北水放假前原型，果然升高咗就係收割嘅好時機。但值得留意係，北水表現方面
由今朝淨流出，喺三點Ａ股收市之後，北水逐步轉返淨流入，但數字就唔算好多，都係大約１５
億左右，低價掃番平貨。
其實早兩日恒指升到２２５００開始有阻力之後，孖屐都有啲轉風向嘅味道，有外資大行都
開始警告「高處不勝寒」，野村經濟學家陸挺更加明示要慎防股市急跌，結果就跌到阿媽都唔認
得。而當時都有傳聞提到，阿爺對於「股市失去理智」都唔係咁樂意見到，所以可能會出手降一
降溫，有傳當局禁止信貸資金違規進入股市，謝絕借錢炒股，唔知有幾多北水炒家因此離場呢？
另外，發改委今日開記者會，事先張揚會由「一正四副」嘅陣容見面，就好似國慶前金融三
巨頭一齊開嘅記招一樣，令到孖屐普遍都憧憬會再有一輪新招，點知就雷聲大雨點小，難聽啲講
係敲鑼打鼓講三幅被，冷水直接兜頭淋落港股，再度提醒孖屐，政策市下係絕無老奉。
Ａ股出現新一輪開戶潮，唔少人都想喺大升市撈一筆走人，不過據講國慶期間新開戶嘅到聽
日開始先可以落手炒，今日算係個教訓，提醒新入場嘅小股民世途險惡，單日都可以波動成咁，
如果之後都要跟就要自負盈虧。
睇返恒指今日係啱啱好落返去北水暫停前水位，聽日走向係點就可以知北水今日套現之後對
於後市係咩取態。由今日消息面嚟睇都係口號式為主，但今日落返去呢個水位後暫時企穩就可以
判斷國慶前一連串政策利作用都仲喺度，後續只係睇氣氛如何，而今日起手都已經有上面樓市氣
氛回暖嘅消息，寄望可以成為魚缸嘅支撐力量啦，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【香港好去處】etnet全新頻道盛大推出！全港最齊盛事活動資訊盡在掌握！► 即睇
