《小傳日記》近期魚缸軟賴賴，係得早兩日陸家嘴論壇提到「科創板八條」，恒指先畀面彈
一彈５００點，但之後連續跌返兩日，到今日已經係接近唔見曬星期三嘅升幅，又落返
１８０００邊吽吓吽吓。
當日中證監主席吳清話，要鼓勵科創板健全發行承銷、併購重組、股權激勵等，更好咁服務
科技創新和新質生產力發展。「新質生產力」其實係舊年下半年先提到嘅新詞，由國家主席習近
平提出，隨後喺中央經濟工作會議都多次提到，主要泛指「戰略性新興產業」同「未來產業」。
一個新詞涵蓋嘅其實都係既有嘅行業，以近期孖屐炒作新質生產力概念嘅對象嚟睇，其實就係創
新科技產業鏈上游產業，例如晶片、雲端設備等硬件。
當外國全面集中開發ＡＩ，尤其係生成式ＡＩ，神州方面都要趕上ＡＩ熱潮，但面對美國全
方位封殺，要做ＡＩ一定要自行研發，「新質生產力」就係發展ＡＩ等等創新科技嘅基礎，先打
底再發展。上個月底成立嘅「大基金三期」就被視為發展新質生產力嘅重炮，單計銀碼就超過
３０００億人仔，而且其中一大投資範疇就係生產廠房，股東方面更有唔少廣東企業，亦都大有
機會係想將廠房開喺深圳附近，近距離支援科技下游嘅發展。
隨後，孖屐由「新質生產力」衍生出「科特估」概念，魚缸入面譬如中芯（００９８１）、
華虹（０１３４７）、聯想（００９９２）甚至比電（００２８５）都算係。「科特估」可想而
知係由中特估變化出嚟，雖然中特估係新字眼，但其實係將一啲一直都有嘅概念股以一個字眼統
稱出嚟，就係高息低ＰＥ嘅國企紅籌。
中特估之所以為孖屐受落，係天然具備穩定兼高息嘅元素；但要講「科特估」可唔可以掀起
好似炒中特估咁嘅熱潮，「有升有息」依然係重點，至今「科特估」入面好多股份都冇派高息嘅
能力，未來即使有國家支持，都要賺到錢先可以派到息，單靠科水並唔能夠真係吸引到孖屐，請
請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】立會議員為趕赴酒會合照，在財會上快速通過87億撥款► 立即投票
