《小傳日記》市建局今日中午宣布，將會啟動「洗衣街╱花墟道重建計劃」，喺展開圍繞花
墟一帶嘅重建，總面績大約２９３１５平方米，分為地盤Ａ同地盤Ｂ，地盤Ａ係由洗衣街至花墟
道沿路嘅５組舊樓，總共２３幢樓齡介乎６４至７６年嘅舊唐樓，而地盤Ｂ就係整個界限街遊樂
場。市建局提到，今次重建受影響業權約１９０個，受影響住戶約２７５個，受影響地舖商戶約
３３個，初步估計收購成本大約２５億銀。
市建局總監（規劃及設計）麥中傑就介紹，今次重建係希望喺花墟一帶建設「城市水道」，
起一個面積唔少於８８００平方米水道公園供市民消閒康樂之用，提供更多公眾休憩空間。事實
上今次重建並唔係空穴來風，早喺２０２１年市建局公布《油旺地區規劃研究》就提到，計劃將
花墟一帶恢復為河道公園，「建立親水文化，增加市區水體，減低熱島效應」。
點解係恢復呢？其實由大坑東球場開始，沿著界限街遊樂場同旺角大球場之間嘅花墟徑，穿
過太子道西落到去水渠道，以前係一條明渠，接收雨水之後一路向西南方向流向大角咀櫻桃街一
帶，就會到達維港。但由於市區發展之後成日有商戶將污水直接排落明渠，令到明渠臭氣熏天，
所以２００８年渠務署就開展２００５年施政報告提出嘅明渠覆蓋工程，將花墟道明渠覆蓋，如
今覆蓋之後嘅渠面主要都係綠化之用。
市建局就話重建後可以提供１３５０個住宅單位，仲有唔少於８８００平方的水道公園同額
外８２００平方米嘅公眾休憩空間，２２０個公眾車位，預計２０３５年落成。配合花墟風格，
將會喺水道兩旁種花樹，加強城市美化。
花墟喺香港歷史悠久，至今都係全港最集中嘅植物市場，加上街尾仲連接雀仔街，有花有鳥
，不知幾風雅。如今重建範圍並唔涉及大量花墟原有舖頭，主要都係將界限街遊樂場改建為水道
公園，強化原本花墟已經具備特色元素，比起全面重建，呢個做法更加突顯到固有特色，雖然最
快都要２０３５先起好，但係成個主題充滿地區特色，比起專登使大嚿錢去「阿茂整餅」有建設
性得多，亦都更加係遊客想見到嘅香港特色，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【香港好去處】etnet全新頻道盛大推出！全港最齊盛事活動資訊盡在掌握！► 即睇
