《小傳日記》突發官宣降準！聽日仲有「大禮包」咁筍？

　　《小傳日記》嘩嘩嘩，阿爺終於聆聽到孖屐嘅呼喚，突發宣布降準！原本全日都只係得阿里
增持一條好料，利好氣氛不過講真就只係利好阿里，半日最多都係升嗰３００幾點。不過Ａ股收
市之後就有驚喜，人行行長潘功勝突然放重炮，提前預告將會喺２月５號降準０﹒５個百分點，
向市場提供長期流動性約一萬億元人仔。
　　Ａ場收市前已經有暗湧，上證綜指尾盤拉升１﹒８％收復２８００大關，魚缸方面喺消息出
之前，一眾中特估已經偷偷地抽升，隨後消息一出，恒指收市前半個鐘再次表演急升，十分鐘內
升超過２００點，最高見１５９７５，不過破１６０００關都係未夠力，最終都只係收報
１５８９９，升５４５點。
　　之前一兩日已經傳「兩萬億救市」，不過普遍孖屐都睇淡消息，認為成真機會麻麻，而過往
都有唔少好消息最後落空嘅歷史，都令孖屐傾向「狼來了」。
　　但係今次人行提前兩星期宣布降準，而且力度明顯加大，對上一次都只係降準０﹒２５％，
多過個別大行嘅預期，所以就令恒指忽然急彈。有孖屐意見就覺得，今次降準畀到市場推動經濟
回穩向好的決心，平抑短期外資淨沽名壓力，更加配合積極財政政策嘅實施。
　　消息來得咁突然，都令魚缸有啲不知所措，但係今日（２４日）來睇短線１６０００阻力仍
然唔細，就要睇降準之外仲有無後招跟住出喇，畢竟潘功勝今日新聞發布會上仲提到會發放「寬
鬆大禮包」，預告將於今明兩日內會發布完善經營性物業貸款政策，支持房地產企業發展同改善
房企流動性狀況，唔知孖屐又會唔會滿意個「大禮包」呢？請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。