《小傳日記》以賭為生嘅澳門都係多得博彩業，政府先可以年年派錢。不過就唔係逢有個「
賭」字都可以喺澳門有運行，澳門賽馬會就難逃執笠嘅命運。
今朝澳門政府開記招，宣布同澳門賽馬會提前解除專營批給合同。澳門政府提到，係澳門馬
會自行向政府申請提前解除合同。澳門馬會前身係澳門賽馬車場，係賽馬車唔係賽馬，１９８０
年起開幕，到１９８８年一度暫停經營，到１９８９年獲賭王何鴻燊收購之後喺１９９０年重開
，逢禮拜五、六就係賽馬日。去到２０１８年，澳門馬會同政府簽訂延長專營合同至２０４２年
，總共２４年半，至今只係六年就提前解約。馬會就解釋，係因為「公司經營出現困難，而且賽
馬活動無法迎合現時社會發展需求」，於是主動申請解除經營賽馬專營批給合同，澳門政府亦認
為賽馬對於澳門市民同遊客都吸引力漸減，所以都同意申請。
澳門除咗跑馬之外，都曾經興過跑狗，不過自從２０１８年，逸園賽狗場被傳出未能妥善照
顧狗隻，被政府要求改善對格力犬飼養條件，不過最終都係未能符合要求，同年逸園賽狗場就被
政府收回土地，亞洲最後一個合法賽狗場都正式結束。
澳門賭業呢幾年來都出現咗好多變化，包括上面提到嘅賽狗、賽馬相繼結束，到貴賓廳被逼
收檔，澳門賭業已經唔及得以前嘅百花盛放。雖然目前六大賭牌繼續維持，但係咁多過往曾經興
旺嘅博彩行業都相繼結束，難免都令人感嘆係一個時代嘅完結。
２０２１年澳門同六大賭企續牌，當中都包含更多發展非博彩業務嘅條款。但澳門係賭城嘅
概念根深柢固，近年雖然有好多雜技、演唱會等等表演舉行，不過都未動搖到「賭」嘅形象。目
前澳門嘅走向係似想做到拉斯維加斯嘅感覺，但係當表演行業嘅收入佔比未等同到博彩帶來嘅收
入，澳門都好難擺脫到「賭」，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】上海有女子赴瑞士接受安樂死，引網民熱議。你是否支持安樂死？► 立即投票
