《小傳日記》星光大道營運權將會喺出年４月屆滿，當初２００３年星光大道就係由新世界
（０００１７）有份出４０００萬銀來興建，去到２００４年４月開放。一直以來由康文署擁有
，新世界負責管理。
而康文署噚日就邀請非牟利機構就星光大道同梳士巴利花園嘅管理、營運同保養工作提交建
議書，希望可以優化尖沙咀海濱成為集藝術、文化、旅遊、康樂及體育於一身的公共空間，合約
由出年４月開始，為期１５年。康文署喺文件列明委託管理嘅範圍，包括佔地５７６０平方米嘅
梳士巴利花園、１﹒１萬平方米嘅星光大道同１２６８平方米嘅餐飲設施，政府會「象徵式」畀
１蚊來委託管理，機構日後須要維持免費向公眾開放並自負盈虧。
過去２０年來星光大道一直都係由新世界打骰，甚至新世界仲成立埋星光大道管理有限公司
來專責星光大道嘅管理。而家睇返當然係有新世界嘅如意算盤，手執一個著名香港地標，大把遊
客喺香港嘅必經之地，由天星開始行到尾，行到又熱又攰，就可以轉入隔籬Ｋ１１ ＭＵＳＥＡ
涼冷氣，食個飯又買吓衫，堪稱一條龍服務。
如今政府要求ＮＧＯ來招標，收得１蚊就要維持免費開放，仲要自負盈虧，咁嘅條件除咗既
得利益者仲有邊個肯啃呢件豬頭骨？邊個又會肯接手營運呢個無乜錢賺、又會益咗身邊「大地主
」嘅地標呢？所以定得呢啲條款，好有可能都係政府為新世界「度身訂造」，鍾意啃就無任歡迎
，唔鍾意啃都無得唔啃。
其實呢啲條款本身都已經係政府同新世界嘅合作模式，２０１５年至２０１９年嘅翻新，都
係由新世界出資，政府今次只係將呢種「合作模式」寫明出來。但正因為合作得咁好，新世界都
已經好難抽身而去。２０１９年翻新重開，就正好遇著疫情，翻新嗰筆錢未回本就要開始捱，如
今新世界想回本，就一定要繼續揸住，可以話想同唔想都係要硬食多１５年，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】中環海濱充氣奇蹟展展品外貌惹網民嘲笑► 立即投票
