噚晚美國公布5月份通脹令人喜出望外，減息預息又再升溫，但之前科技股升得太急，反而孖屐趁機由科技股抽錢泊落低殘股，於是魚缸掘咗咁耐個氹終於裝到水。
魚缸科技股今年借著上半年嘅升勢都升返唔少，高盛近期就出咗報告，曬一曬近期嘅成績表。其中針對神州遊戲方面，就成功貼中幾隻好股，包括心動(02400)年內大升咗七成二，係所揀遊戲股入面表現最標青，其次就係年內升三成半嘅B站(09626)。
不過有升就有跌，心動升咗四個月，近期都開始有回調，高盛都知係時候食胡，於是報告就提到都轉為唱淡心動。高盛就話，目前新推出嘅遊戲流量都開始出現分化，而心動年初推出嘅大熱遊戲《出發吧！麥芬》似乎「出道即顛峰」，新出兩個月之後每日活躍用戶數就已經到頂，而且喺之後係持續下行。高盛就話，心動之前一直表現出色而且估值豐厚，年初至今一直都係領域內表現最好嘅股票，但就預計2025年每股盈利將會下跌三成九。
其實心動面對緊嘅同好多遊戲股都一樣，目前神州遊戲市場已經飽和，一直都只係內捲，即係塘水滾塘魚，會打機嘅都已經係嗰班人，爭嚟爭去都係嗰個餅，唯一可以再做大個餅嘅就只係海外市場。所以高盛都提到，心動嘅「上行風險」就係《出發吧！麥芬》將會喺第三季尾喺韓國推出，到時就可能再掀一次熱潮，就睇吓高盛今次準唔準囉，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】中環海濱充氣奇蹟展展品外貌惹網民嘲笑► 立即投票
