《小傳日記》奈雪的茶創上市新低，點解咁慘情？零售低迷遇上內捲

　　今日個市升升跌跌，一個字-「悶」！好似近日天氣咁，一時好天一時落雨。兩隻新茶飲股價表現亦同樣迴異。奈雪的茶(02150)股價今日創自2021年上市以來的2.07銀新低。茶百道(02555)則見12.44銀的一個月高。
　　三年前，同樣係6月尾呢個時候，有「新茶飲第一股」之稱嘅奈雪的茶喺港交所上市，上市價19.8銀。挂牌首日已經破發，收市價比上市價低約13.5%，報17.1銀。而首日高位18.98銀亦成為奈雪的茶股價歷史高位。任何投資者喺呢個高位沽貨都值得開香檳慶祝，因為呢個價位可能以後都見唔返！
　　新茶飲第二股茶百道今年4月嚟港上市，上市價17.5銀。同奈雪一樣，首日即破發，而且首日表現比奈雪更慘烈，當日收市價比上市價低26.86%，收報12.8銀，上月更低見9.63銀，之後反彈。雖然股價今日見一個月高，但仲未返到家鄉（上市價17.5銀）。
　　新茶飲股價之所以升唔起，只因呢個行業競爭愈來愈激烈。自從2012年喜茶橫空出世，帶動茶飲升級，亦為呢個行業帶來一陣熱潮。講明係升級，當然要加啲花臣啦！於是就喺茶入面加入牛奶、水果之類嘅嘢，所以稱之為新茶飲。產品升級，價格梗係都升咗一大級啦，一杯果茶飲品閒閒地賣30銀人仔。喺內地二三線城市，隨時貴過一餐正餐。所謂新屎坑三日香，就算價格貴，新茶飲早幾年依然大賣特賣，生意好到做唔切，買杯嘢飲隨時要排成個鐘。
　　既然好做，難免引入競爭者，而且係海量嘅競爭者。為咗生存，梗係各出奇謀。有走高檔，有走低端。高檔者如奈雪，果茶類產品最高價格近30銀；茶百道產品最高僅20銀左右，走低價嘅蜜雪冰城則多在4至10銀。有媒體喺年輕人集中嘅武漢光谷廣場觀察，半徑500米範圍內有超過40家奶茶店，其中走大眾化價格嘅蜜雪冰城有9家，走中檔路線嘅茶百道有3家，主打高檔嘅喜茶同奈雪則各有2家。以數量計，走低價路線嘅蜜雪冰城具有壟斷地位。
　　近日有內媒引述餐飲數據平台窄門餐眼數據，截至2024年6月10日，全國奶茶飲品門店總數為42.7萬家，1年內新開門店數量為16.5萬家，淨增長量則為4.6萬家。換言之，1年內倒閉嘅奶茶店約有12萬家。以2023年全國奶茶飲品門店總數38.1萬家計算，倒閉率達31.5%，即係話，差唔多3間就有一間執笠，比例之高令人意外。以前高價新產品遇上經濟好，仲會有人捨得買。但而家零售低迷，遇上內捲（競爭激烈），收入未必穩定，大家慳得就慳。所以，要賣貴價嘢真係要諗諗。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。