《魚缸博客》維他奶偷偷挾升，楊協成增持撐價有得吼！

　　魚缸月中以來都已經回歸淡靜，政策市告終之後，魚缸回歸炒股不炒市，就要靠自己雷達去搵有咩炒。大市炒完之後，通常都會有啲二線股開始追落後，近呢一星期都有好多細股炒起，今日博客就吼到隻維他奶(00345)。
　　之前就公布，新加坡紙包飲品大王楊協成就同信置(00083)主席黃志祥胞弟黃志達有份控制的家族辦公室Kuang Ming Investments，合共對維他奶增持至超過5%。據披露楊協成聯同上述家辦喺10月7日場內以每股平均價大約6.28元，增持維他奶307.4萬股，涉資1931萬銀，持股量由原先的4.94%升至5.22%。
　　曾經楊協成都有意大力發展香港市場，但維他奶地位不可撼動，所以近年市面上都少見咗楊協成產品，比較常見嘅已經係罐裝「清涼爽」涼粉同蔗水，但都唔係周街都買到。楊協增持後就提到，增持行動符合集團投資亞洲行業領先企業戰略，提高喺內地同香港物飲料行業敞口，後續更加會不時考慮進一步投資。
　　消息之後維他奶就開始有起飛跡象，今個星期頭四日成交量都逐日上升，到今朝更加大升一成有多，話唔定孖屐就係見到有新加坡楊協成呢條水照實而炒起。今日升得有啲急，升破今年5月至6月嘅雙頂阻力（7.4銀至7.5銀），見支持訊號，前述阻力位可以當係買入價，上望大約9.5銀至10銀，失守250天線（約6.58銀）就去到6.5至6.52銀止蝕。

《編者按》本欄搜羅即市傳聞，惟消息未經證實，《經濟通》亦不保證內容之準確性。