今日有3隻新股同時掛牌，分別是嘀嗒出行(02559)，天聚地合(02479)以及老鋪黃金(06181)。如果3間公司嘅老細帶埋手下，排住隊敲鑼，場面應該都幾熱鬧下。早前招股時，3隻新股都獲得超高額認購，當中嘀嗒出行獲超額認購112倍，但已經係3者之中最低。老鋪黃金獲超額認購581倍；而天聚地合獲超額認購602倍。既然咁高人氣，開市梗係要睇實。結果老鋪黃金跑出，高開59%，報64.5元，上市價40.5元，未計手續費，每手100股賺2400元，相當唔錯。
唔知係唔係巧合，兩隻獲500、600倍超額認購新股，今日首掛都有錢賺。而只得112倍超額認購嘅嘀嗒出行就要蝕錢。嘀嗒出行今早低開13%，報5.23元，上市價6元，未計手續費，每手500股要蝕385元。不過，股價而家比開市高少少，收市可能會蝕少啲都唔定。
另一個巧合係，3隻新股嘅市值都係大約50幾億元咁上下。不過，大家嘅賺錢能力就好唔同。以2023年度盈利計算，天聚地合最弱，年度純利只得大約3500萬元，以市值55億元計算，市盈率過百倍，真係有啲貴。嘀嗒出行2023年雖然賺成3億元，但其中2.1億元係投資項目嘅公平值變動，扣除呢筆數，其實1億元都唔夠。三者之中，盈利最高嘅係老鋪黃金，2023年有成4.16億元純利。不過，2022年同期則1億元都唔夠，比起2021年更錄得倒退。而2023年純利忽然咁神勇，按年大增3.4倍去到4億元有凸。雖然公司可以通過擴充營業達到快速成長，但內地呢兩年消費疲弱，要做到咁好成績一啲都唔容易。筆者佩服之餘，難免擔心高基數下，純利可唔可以持續。如果筆者抽到呢幾隻新股，今日點都會走咗先，有錢賺都要袋落袋先算係你嘅。至於蝕嘅，蝕幾百元都算了，畢竟係新股，難以捉摸，免得夜長夢多。
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》【驚恐症來襲】無預警發作...患者親身講述得病經歷及康復過程！必要時自己做一件事可幫到手！► 即睇
