《魚缸博客》昇能成毫卓悅成仙，玩股仔就似「過大海」！

　　過咗業績期，魚缸表面趨於平靜，但其實一樣話題不斷。昇能(02459)近日突然爆出，成為魚缸風頭躉。先係幾日前股價急瀉九成九，搶佔魚缸焦點。本以為件事會慢慢丟淡，點知股價復牌後仲要連續兩日大反彈，昨日高位有成9毫7，就快擺脫毫子股變蚊股，可惜尾段碌返去，最後7毫8收市。
　　有朋友事後呻笨，話大跌嗰日因為停過牌，所以事後無跟進。話如果復牌開始見到反彈，一定會搭下順風車，兩三毫子真係博得過。博客聽完哈哈大笑，又難怪佢咁諗。理論上，如果由股價低位1毫4開始計，彈上昨日最高9毫7埋單，短短三日升左近6倍，的確好和味，事後當然覺得兩三毫博得過。倘若結局係不升反跌，跌返去變仙股，甚至長期停牌，咁仲會唔會覺得兩三毫博得過？不過，朋友唔係得個講字嘅人，博客都信佢夠膽搏，學佢話齋，少少地當係「過大海」就算。
　　細價股大升大跌其實都見慣不怪，但唔係隻隻細價股都有低位反彈嘅機會。好似卓悅(00653)咁，股價7月初經歷幾次大插水，股價7月1號收市價有4仙半，到7月8號跌至1仙8，短短幾日唔見咗六成。大跌之後，雖然大股東出來澄清，話自6月20號之後未出售任何股份，亦無被強制平倉。
　　可惜卓悅始終晚節不保！根據聯交所資料，大股東陳健文喺16日減持3000萬股，每股平均價1仙7，涉資51萬銀。作為大股東，股價已經跌成咁，無入市托價都算，仲要自己踩多一腳，51萬銀都唔放過，仲發夢卓悅有轉機？
　　卓悅股價近日一直停留喺1仙位置，散戶或者會「鬆一口氣」，終於跌無可跌了。點知幾日前，卓悅就公布，建議20合1，即係話每股由1仙變成2毫子，有機會再跌過。如果嗰位朋友喺7月初大跌後買入卓悅，當「過大海」嘅話，而家應該做好心理準備，批貨隨時好似石沉大海咁不見天日！所以話，玩股仔真係要小心再小心！

《編者按》本欄搜羅即市傳聞，惟消息未經證實，《經濟通》亦不保證內容之準確性。