《小傳日記》SEC想禁絕美國虛幣交易？虛幣平台一定唔會硬食！

　　Bitcoin今日忽然盤中低位反彈超過兩個巴仙，最多試過逼近30000美金大關。不過就喺早兩日Coinbase CEO先大爆美國證交會(SEC)有意只係畀Bitcoin成為唯一嘅Crypto！
　　Coinbase CEO Brian Armstrong早兩日做《金融時報》專訪，就話SEC有人曾經同佢講，話所有Crypto都被認定係同股票一樣，要經當局監管，所以除咗Bitcoin之外，其他無經正式程序申請交易許可嘅，都應該要被下架。
　　Brian Armstrong就同《金融時報》講，根本無可能認同SEC嘅講法，如果SEC真係令Bitcoin成為唯一Crypto，將會係判美國Crypto產業死刑，所以如果行到呢一步，就惟有告上法庭。SEC就回覆話，一路都無正式向Coinbase提出呢個要求，不過如果有都「好合理」。
　　但一路都有講，雖然Crypto而家係具有交易嘅價值，不過如果將Crypto嘅根本視為證券，其實係邏輯謬誤。Crypto稱之為貨幣，因為創立嘅時候就係想用來做一種貨幣，係用來做交易嘅工具，而唔係成為被交易嘅貨物。當初創作造Crypto出來，就係因為出現雷曼事件，令到市場想有一種不受市場影響、去中心化嘅貨幣，可以用嚟自由交易。如果而家SEC一意孤行要禁絕美國Crypto，咁樣其實係會同「去中心化」相違背。
　　既然SEC都已經預告，而Coinbase都已經做好準備，幾時真係嘈到上法庭都未知，到時就真係令Crypto前景一錘定音，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。