「康宏風暴」搞足三幾年，今日終於有最新進度，康宏控股時任董事曹貴子、時任首席財務總監陳麗兒及時任董事陳毅凱，三人被控詐騙和作出虛假陳述罪，今日區域法院裁定三人罪名不成立，究竟呢個風暴可唔可以今日甩難呢？而小股東唔通有望可以套現離場？

（網上圖片）

風暴發生三周年，曹貴子曾身在外國

（Shutterstock圖片)

　　事件起因，在於2017年，有「股壇長毛」之稱嘅David Webb發表「謎網50」，並揭發50間互相持股嘅上市企業，其中康宏環球（01019）正正就係清單上的核心股分；2017年12月，證監會與廉政公署聯合行動，帶走多名康宏高層，包括前主席王利民、前副主席馮雪心等人，而被指一直掌控康宏及多間「謎網股」嘅康宏前執董曹貴子，因為一直身處外國而未有被帶走。

　　當時由台灣股東富邦主導嘅康宏更入稟法院，控股曹貴子等24人及4間「迷網50」公司，指其於2013年起，取得控制權後促使公司作出不當股份分配，及不理性嘅放貸等決定，被視為公司內部「台灣幫」大戰「深圳幫」。其中「台灣幫」為持有公司29.98%股分嘅富邦蔡氏；另一邊廂，「深圳幫」則是持有29.91%股份嘅深圳佳兆業太子爺郭曉群，以及持有7.26%股份嘅佳兆業前員工陳佩雄，兩大幫派經常就董事局爭奪權針鋒相對，公司停牌近三年，亦隨即接近被除牌的死線。

公司上周曾開股東會，不料數分鐘被終止

（Shutterstock圖片)

　　由於面臨除牌危機，公司係上星期四（11月26日）舉行股東特別會（EGM），而股東會只有25人可進場，其中包括佳兆業集團太子爺郭曉群代表方：馬時亨、石禮謙及譚禮寧等人。據了解，譚禮寧係股東會一開始就阻擾會議進行，並指控由現任董事主席罷免議案有衝突之嫌，所以動議由馬時亨做大會臨時主席。由於最後無法順利進行會議，獨立非執行董事林國昌宣布股東會延期。

　　會後譚禮寧指：「公司情況一塌糊塗！」而馬時亨更質疑會議主席唔識程序。雖然康宏於當晚發表公告指，會議中斷係因為郭曉群打斷會議；隨後郭曉群又表示，呢份公告內容不屬實，保留一切法律追究的權利。

　　嘩，火藥味咁重，似乎雙方都唔肯讓步，真係難為小股東們囉！

小股東何去何從，除牌與否仍有斟酌

（Shutterstock圖片)

　　小股東們最擔心，就係股份幾時可以復牌套現離場，其實港交所係2018年對上市規例作出修改，如果持續停牌18個月就可以將其除牌，原則上康宏風暴發展至今，應該係可以除牌；但公司內部仍有48億資產，如果真係停牌，小股東就會見財化水，如果有人想侵吞公司資產真係好無保障。

　　雖然康宏今年7月向上市覆核委員會提出要求延長復牌限期及恢復上市地位理據，但係公司一路都未做到復牌要求；而10月時候小股東就向證監投訴，驚康宏透過除牌方式私有化，小股東利益就會受損，所以目前係咪除牌都未有定案。

撰文：李皆穎