09/12/2020
《Online有話兒》女性擔起半邊天!默克爾獲頒最具權力女性首位
幾時都話,在職女性係永遠值得尊敬嘅,因為佢地除咗照顧屋企之外,對外都要夠硬淨先可以負擔工作,而現今不論政經界別,女性都擔起半邊天,就好似美國《福布斯》剛剛公布2020年「全球百大最有權力女性」排行榜,德國總理默克爾又再蟬聯榜首啦!究竟呢班「女超人」曾經講過乜金句值得學習吓呢?今日我哋就一齊重溫!
(Shutterstock圖片)
第一位默克爾:難以撼動的事物 實際上可以改變
(Shutterstock圖片)
貴為德國「阿一」嘅默克爾,無咁上下斤兩都幾難坐穩呢個位,對內要治理德國,對外又要穩定歐盟,早幾年又要處理難民問題,形容佢係「女超人」都無誤,唔係又點成為《福布斯》最有權力女性第一位呢?而呢位女超人可以力排眾議咁,打低一個又一個難題,係因為佢從來都唔怕作出挑戰:
「任何看起來固定不變、難以撼動的事物,實際上可以改變。而所有改變,不論大小,都始於我們內心。」
默克爾於2019年係哈佛大學作演講,根據自己過去經歷,同大家分享咗一啲政治及人生哲學。默克爾不論處理難民事件定係經濟議題,都睇得出佢手腕高明,因為在於佢肯撼動難題,呢個要畀讚!
第二位拉加德:要想係男性世界脫穎而出 就要好似鱷魚皮咁臉厚
(Shutterstock圖片)
講起拉加德,唔熟悉金融行業都未必聽過佢個名,但佢曾經就任國際貨幣基金組織(IMF)總裁,現任歐洲央行行長,基本上歐洲經濟都要睇佢頭,借錢畀邊個國家、要畀幾多利息,都係由佢一個獨當大旗。困難嘅係,金融及經濟行業從來都係由男性做主導,佢可以爬到上一個咁高位置,心得就係:
「想要係男性世界裏脫穎而出,女性就必須擁有好似老鱷魚一般厚嘅臉皮,係某些時候,很不幸,厚臉皮是必要條件。」
正正因為拉加德一個咁Tough嘅性格,外界形容佢係一個「女鬥士」、「致命女人」,加上佢身高一米八,成日著住對High Heel係銀行出出入入,個種高傲嘅氣勢唔係個個都Carry到!
第三位賀錦麗:我或許係第一個入白宮辦公室嘅女性 但唔會係最後一個
(Shutterstock圖片)
美國大選搞足幾個月,總算叫塵埃落定,而賀錦麗將會成為美國首個女性副總統,有指拜登因為年事已高,所以最多只會做一屆,下一屆好大機會就係派賀錦麗直接參選總統!所以佢成日都發激勵人心嘅發言,並鼓勵女性應該勇敢追逐夢想,係佢勝出副總統個晚,就曾經咁講過:
「我或許係第一個入白宮辦公室嘅女性,但唔會係最後一個。」
隨後賀錦麗又指,呢次選舉中,睇得出「民主」係接受緊考驗,係美國精神岌岌可危之際,美國終於迎來嶄新一日,係而家呢個充滿挑戰嘅時代,選民投下選票,意味佢地選擇希望、團結、正直,每一個女仔都會見證到,美國係一個充滿可能性嘅國家!
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票