《小傳日記》季績期差唔多完,車股都差唔多公布曬業績,記得理想(02015)推出
MEGA之後銷量撻Q,但一失足成千古恨,賣衰一款車已經大大影響理想第一季成績表,仲有
140銀以上一路仆直到今日連80銀都不保!
相反之前被比下去嘅小鵬(09868),最新出份成績表可以話喺漆黑之中著起咗車頭大
燈,片贏返理想一次。小鵬公布今年第一季業績,經調整虧損由上年同期22﹒12億人仔收窄
至14﹒08億人仔,總收入多62%至65﹒48億人仔。雖然仲係蝕錢,但今次成績表最省
鏡就係毛利率方面,第一季毛利率達到12﹒9%,而上年同期同2023年第四季毛利率分別
係1﹒7%及6﹒2%,單係按季就翻咗番。
之前都提過,小鵬成功撬走前長汽(02333)高層王鳳英過檔,將會係小鵬轉運嘅關鍵
,今次可以算係王鳳英上場後交出第一份對辦嘅成績。上季收入按年多62%,但銷售成本只係
多44%,研發開支只係多4﹒2%,更加強勁係「銷售及行政開支」方面,按年只係微增,接
近係持平。小鵬業績提到,行政開支減少主要係由於向特許經營店支付嘅佣金減少以及營銷、推
廣同廣告開支減少。而王鳳英就係將特許經營帶入小鵬嘅靈魂人物,今次正正係證明特許經營店
係有效達致降本。
事實上,自從小鵬落後之後就有努力去改善盈利表現,泊好福士碼頭就係一大重點。「服務
及其他收入」季內達到10億人仔,而上年同期就只有5﹒2億人仔,表按年大增93%。小鵬
解釋係因為同福士進行平台與軟件戰略技術合作,所帶來嘅技術研發服務收益所致。
面對著減價戰,理想跣呔主要係因為高估咗市場對於高價車嘅需求,無為減價大戰做好準備
。而小鵬韜光養晦,做好降低成本同推出平價車準備,先可以喺第一季成績上跑贏,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
WoW WoW星期三:健康網購產品低至$99!(只限今天)► 火速行動