《小傳日記》美團出海大手筆投資，複製香港經驗就一定成功？

　　《小傳日記》上周五（２９號），美團（０３６９０）公布第三季業績，盤數睇落真係唔錯
，經調整純利按年升１﹒２４倍，去到１２８億人仔咁多。收入亦都升２２﹒４％，差唔多有
９３６億人仔，兩樣都勝過市場預期。而且新業務嘅虧損都收窄埋，本來好似好正路咁。
　
　　但績後市場普遍擔心美團對出海業務Ｋｅｅｔａ加大投資，預料Ｋｅｅｔａ到２０２５年個
虧損會愈嚟愈大，搞唔好仲會抵銷曬現有嘅盈利前景添。因此，部分大行就下調美團嘅目標價，
搞到美團股價今朝一早受壓，最多嘅跌超過半成，跌到差唔多１６０銀。
　
　　摩通嘅研究報告就指出，因為美團最近進入沙地阿拉伯嘅外賣市場，可能會為第四季同埋明
年帶嚟更多虧損，仲有可能限制整體新業務虧損收窄嘅空間添。佢哋預計第四季及明年嘅虧損分
別會有２１億人仔同６０億人仔咁多。滙豐環球研究預計，美團第四季嘅投資可能會按季增加幾
億人仔，而且預計２０２５年嘅虧損可能進一步擴大添。
　
　　講到美團嘅海外業務Ｋｅｅｔａ，就一定會講到香港，畢竟香港作為美團海外業務嘅第一站
，香港嘅運營經驗對美團出海極其重要。美團開拓香港嘅策略可以用兩個字總結－－「燒錢」。
唔知大家仲記唔記得舊年５月Ｋｅｅｔａ推出嘅「１０億港幣激賞計劃」呢，每位新用戶註冊就
可以獲得價值　３００銀嘅優惠券，用作折扣同埋抵消運費等等。７月，ＫｅｅＴａ又投入
３００萬銀推出免運費活動，每周四、五、六都係ＫｅｅＴａ嘅「免運費日」，活動期間，
ＫｅｅＴａ　所有用戶每日都可以獲得一張無門檻免運費券，直接免除訂單運費。
　
　　美團嘅大手筆投入，確實取得非常矚目嘅成果。據市場調查機構Ｍｅａｓｕｒａｂｌｅ　
ＡＩ嘅數據反映，由２０２３年５月打入香港市場以嚟，ＫｅｅＴａ嘅訂單量市佔份額按月持續
升緊，去到２０２４年３月，按訂單量計算，佢嘅市場份額已經去到４４％，超越
Ｆｏｏｄｐａｎｄａ同Ｄｅｌｉｖｅｒｏｏ，成為香港第一大外賣平台。
　
　　今年１０月，美團喺沙特阿拉伯首都利雅得推出咗Ｋｅｅｔａ，複製之前喺香港經驗，使大
筆錢去搞營銷手法，唔知今次仲可唔可以好似喺香港開頭咁成功呢？對於筆者呢個小市民嚟講呀
，梗系希望美團可以賺多啲啦，事關賺多啲就可以同我哋呢啲用戶派多啲優惠券，請請！
　　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。