《小傳日記》美的上市賀中秋，股民懶得抽，唯有靠首掛出力谷！

　　《小傳日記》中國家電龍頭美的集團（００３００）（深：０００３３３），千呼萬喚終於
喺香港啟動招股，招股價介乎５２至５４﹒８銀，較上星期五（６日）其Ａ股收市價
（６３﹒０２人仔）折讓兩成至兩成半，折讓幅度較市場預期多。美的集團一手１００股，入場
費５５３５銀，以上限價計集資最多近２７０億銀，順理成章成為本港今年新股集資王，兼三年
來最大型新股。
　　只可惜，招股反應雷聲大雨點小！美的集團首日（９日）開始公開招股，只得２﹒６５億銀
孖展認購，尚未足額。截至招股第二日（１０日）反應依然慢熱，綜合多間券商數據，暫只錄得
約５﹒９億銀孖展，佔公開發售４４％，仲係未獲足額認購。不過，國際配售部分已獲足額認購
，難怪有底氣放話要以上限定價。
　　呢邊Ｈ股招股反應一般，嗰邊Ａ股股價就跌唔停。由９月４日最高６６﹒７人仔，跌到噚日
（１０日）收市得６０﹒７５人仔，累跌９％。究竟係因為知道Ｈ股有兩成折讓，搞到Ａ股要跌
返夠本，實行拉近距離？定係見你Ａ股係咁跌，變相折讓縮水，搞到Ｈ股少咗人去認購？真係唔
知邊個累邊個，或者呢啲就叫累鬥累。
　　可能知道Ａ股股價連續下跌會影響Ｈ股認購氣氛。美的Ａ股今日忽然神勇，升０﹒９１人仔
，收報６１﹒６６人仔，但整體Ａ仔場氣氛仲係低迷，上證指數上星期先跌穿２８００點大關，
今日仲一度低見２７１０，試問美的又點可以獨善其身？
　　講番美的折讓招股，學啲股評家話齋，好多Ｈ股比起Ａ股都有折讓啦，呢Ｄ都唔係乜嘢新鮮
事，就以中石油（００８５７）為例，今日Ｈ股比起Ａ股都有三成幾折讓啦，有咩出奇啫。
　　除咗折讓價唔夠誠意之外，內需疲弱亦都影響投資者對美的嘅期待。事關呢兩年內地經濟增
長放緩，消費降級，加上房市不振，大家都擔心對家電嘅需求減少。雖然早排中央推出「以舊換
新」政策，不過主要流於口惠，對家電股股價提振都係曇花一現！
　　雖然認購反應唔理想，但只要美的喺中秋節（１７日）掛牌首日盡力谷，等股價升返多少，
俾撐場嘅投資者執番啲就已足夠，認購超額幾多倍真係唔緊要，股票有錢賺永遠先至最重要！請
請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。