《小傳日記》特海國際慢半拍煲起！ＭＶＰ上任護航出海無得輸？

　　《小傳日記》海底撈（０６８６２）旗下負責出海重責嘅特海（０９６５８），星期一公布
第三季業績，按年蝕轉賺大賺３７７２萬美金，折合大約２﹒９３億港紙，不過前兩日股價唔太
郁，到今日先有反應彈起兩成有多，結果就成為大市回吐下嘅逆市奇葩。
　
　　爬返隻績，按年由蝕１３９萬美金轉賺３７７２萬美金，數字上好似好靚仔，咪住先，業績
都咁高嘅純利有好大程度因為匯兌收益淨額較去年同期大增３４６０萬美金。特海係做國際業務
，喺匯率上今季取得優勢，隨著匯價波動未必次次都贏通街。
　
　　不過單計營運收入都有近１﹒９９億美金，比去年同期都多咗一成半，所以就算唔計匯兌收
益，咁都的確係有所改善嘅。呢份業績，係楊利娟調任特海ＣＥＯ兼執董以來嘅第一份成績表，
既係特海業績，更係佢展現身價嘅成績表。楊利娟６月先由海底撈ＣＥＯ轉任特海ＣＥＯ，三個
月就已經做到嘢，更加令人期待之後可以將特海發展到乜嘢程度。
　
　　楊利娟身為海底撈嘅救命恩人，係由創辦人張勇一手一腳訓練出嚟嘅開國元老，由服務員做
到副ＣＥＯ，２０２２年３月臨危受命成為海底撈ＣＥＯ，為當年因為睇錯市急劇擴張而勁蝕嘅
老闆張勇處理呢盤爛攤子。結果張勇無睇錯人，楊利娟推行「啄木鳥計劃」成功幫海底撈轉虧為
盈，成為海底撈最大功臣。
　
　　再次身負重責嘅楊利娟，今次為咗海底撈嘅出海挑戰而上陣，當然將「連住利益、鎖住管理
」嘅策略照辦煮碗移植到特海之上。另外重要一點就係，外國客未必一樣鍾意打邊爐，為此特海
喺海外試行多項非火鍋嘅餐飲選項，例如燒烤、快餐、麵館甚至清真火鍋。喺老闆娘舒萍鄉下新
加坡亦都試行「嗨嗨有料」，明顯係嘗試緊喺海外各地搵緊一隻爆產品款嚟搞大佢。或者特海今
日爆升兩成，都只係未來嘅一個小起步，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。