《小傳日記》未開賣先減價！新車全線３０萬以下！小米兵不厭詐？

　　《小傳日記》業績期一完，本以為焦點會喺壓軸放榜嘅重磅股身上，點知一早出咗成績表嘅
小米（０１８１０）呢個時候先嚟搶鏡，收到上個禮拜五先肯為ＳＵ７開價，即時成功突圍。
　　ＳＵ７喺３月２８號登場，最終公布標準版售價由２１﹒５９萬人仔起，Ｐｒｏ版
２４﹒５９萬人仔，而最高配版Ｍａｘ都係２９﹒９９萬人仔，全部都係３０萬人仔以內，比起
之前孖屐預期嘅３０萬人仔起跳平咗一大截，成為復活節期間最大隻嘅「出奇蛋」。
　　標價震撼準買家，銷情更加震撼孖屐。據講小米車一到門市，趁墟嘅人龍就無停過，個個都
想一睹小米老字號出嘅新車，結果條隊排到商場落閘為止。當然多人睇都多人買，如果一直有吼
住ＳＵ７嘅準買家，一見到呢個靚價恐怕都會忍唔到手。上面有網媒報道，ＳＵ７發表４分鐘之
後，落大訂人數就已經過萬架，未夠半個鐘就成５萬架！唔少賣車行家都話咁嘅速度實在少見。
　　雷軍發布ＳＵ７大會後承認，原本真係唔捨得咁平賣，標準版原價係要２２﹒９萬人仔，
ＭＡＸ版更加要３５萬人仔，但考慮到減價潮影響，所以「ＳＵ７定價既要讓消費者覺得有誠意
，同時虧損也要讓小米能扛得起」，所以就「未開賣先減價」，一律３０萬人仔以下。
　　ＳＵ７售價係就係低過預期，但係呢個預期唔係來自孖屐，而係來自小米同雷軍，小米再一
次贏喺消息戰上。自小米開發新車以來，小米官方對於消息流通就好似起咗個水壩一樣，游刃有
餘咁控制小米車消息定時定量咁流出。雖然小米曾經敲鑼打鼓話，要捉拿惡意曝光保密資料嘅行
為，但係流出嘅資訊都啱啱好成為炒作嘅材料。
　　ＳＵ７開發時間長，每隔一段時間就總有些少關於小米車嘅傳聞出現，唔多唔少，正好維持
住話題，又唔會過分聚焦。到埋牙階段，正當孖屐都密切留意小米車定價，官方就開始嚴密禁止
最終定價流出，令孖屐嘅好奇心愈來愈大。於是就由雷軍漏一漏嘴提到小米車「天生麗質難賤賣
」，「小米汽車不會定價在２０萬元以下」，為孖屐塑造「小米車唔平」嘅期望管理，隨後就一
次過公布全系列３０萬人仔以下，將壓抑嘅好奇心徹底釋放，有流量更加有變現力度，２４小時
就賣出差唔多８﹒９萬架。
　　無預期變成大超預期，ＳＵ７嘅發布至銷售堪比原子彈爆發原理。小米車出爐，結果都係用
返賣手機嘅老招數「平價搶攻」，而新招就係多咗少少期望管理，效果居然咁有殺傷力，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。