《小傳日記》開放加盟皆因市場飽和！海底撈贏面有幾多？

　　《小傳日記》海底撈（０６８６２）終於都係忍唔住手，噚晚宣布正式開放加盟店，比起之
前話因為想控制質素而拒絕開放加盟，終歸都係殊途同歸，走在餐飲公司嘅必經之路上。
　　據內媒話，目前海底撈已經開放加盟通道，潛在加盟商可以ｃｌｉｃｋ入官網入面「加盟合
作」，填寫資料之後就可以揀想投資嘅金額，有四個選擇，包括係１０００萬銀（人仔．下同）
以下，１０００萬至２０００萬銀，２０００萬至５０００萬銀，以及係５０００萬銀以上，即
係最低入場費都要１０球！
　
＊想有增長就必先「下沉」＊
　
　　過去呢年幾，間間餐飲公司都無可避免要開通加盟渠道，就算係之前嘅奈雪的茶
（０２１５０）或者如今嘅海底撈，就算幾想保持自己嘅品質同風格，結果都走唔甩大勢所趨，
背後嘅原因同市場飽和有莫大關係。
　　如果想賺錢，開舖喺北上廣深會係首選，其次嘅次一線城市都仲有力可以賺得到，而未開放
加盟之前，識計數嘅餐飲企業已經部署曬呢批城市嘅旺區，開唔到更加多舖，因為根本供應已經
同需求對等，再開只會落得供過於求，最後只會自己咬自己。所以餐飲企業都謀求向外發展，第
一步就係做下沉市場，雖然單價低，不過密食當三番，做得起嘅話就連偏僻如淄博都會成為燒烤
之城。
　
＊贏就一齊贏，輸就你孭曬＊
　
　　但始終唔係一線城市，消費力一定比唔上，要成為「下沉市場之王」係一場賭博，投資額可
以無咁大，但風險一定有，所以大餐飲企業就諗出「加盟」呢條橋，當新晉加盟商加入，當然已
經好難喺插針都插唔入嘅一線城市入手，想減低競爭就要做開荒牛，開喺少啲行家嘅二三線城市
。對加盟商而言，係一個發圍嘅機會，但對提供加盟權嘅餐飲企業嚟講就係攤分咗風險，先將加
盟費袋袋平安，再要加盟商幫襯自己買材料同機器，袋埋呢筆之後，生意好或者唔好，都係加盟
商自己食曬。下沉市場風險大，可能十幾廿間先有一間成功，加盟商想把握想成為其中之一，但
係分享經營權嘅餐飲企業已經避開風險而先將加盟資金收入袋。
　　要數開放加盟最成功嘅餐飲企業，蜜雪冰城都算係表表者，招股書提到截至上年９月全國總
共有超過３２０００間分店，高達９９﹒８％都係加盟店，與其話蜜雪冰城係賣飲品，實際上其
實係賣招牌。不過全國３萬間有多，蜜雪冰城搞ＩＰＯ集資嘅下一步就係出海，吼緊同樣係低消
費力但係人多多嘅東南亞市場，相信呢個都係連下沉市場都飽和之後嘅出路。
　
＊海底撈最平可以賣到幾錢？＊
　
　　你又搞下沉市場，曾經都有內房去搞下沉市場，但結果係咩境況就係而家見到咁嘅樣。所以
其中一個攻打下沉市場嘅要點就係單價要低，高價嘅商品房無人吼，賣到幾蚊杯嘅檸水先有人買
。蜜雪冰城成功到，但係海底撈又係咪可以平到「密食當三番」？相信都有好大難度。可以預期
初時會有比較多加盟商加盟海底撈，但入場費至少１０００萬銀，加盟數目嘅增長速度都好令人
懷疑。
　　下沉市場，絕對係零售企業非接不可嘅燙手山芋，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。