《魚缸博客》上個禮拜五（３０日），見黑芝麻（０２５３３）炒到㷫烚烚，忍唔住要講幾
句，結果股價真係上唔到上市價，今日（２日）低位比禮拜五收市價再跌一成半。唔知會唔會有
人上個禮拜，見到股價係咁升就走去接火棒？不過，魚缸今日繼續有呢Ｄ大奇跡發生。事關嘀嗒
出行（０２５５９）今日接棒，股價最多升近五成，一度成為升幅榜冠軍。至於會唔會步黑芝麻
後塵，升完一日貨仔，又或者升半日貨仔就脚軟？暫時唔敢講。
個股大升大跌好多時都要搵個理由，又或者搵個藉口。嘀嗒出行公布中期業績，半年轉賺
９﹒４８億人仔，而舊年同期就蝕２﹒２億人仔，睇落似乎唔錯。但期內收入只升２％，至４億
人仔。而毛利方面甚至下跌２％，即係話盤生意唔見有大起色，咁點解公司可以虧轉盈？關鍵係
一筆可轉換可贖回優先股公允價值變動，由虧損轉收益８﹒７億人仔。情況同黑芝麻有Ｄ近似。
不過，嘀嗒出行股價要返家鄉，難度比起黑芝麻更大。嘀嗒出行６月尾上市，上市價齊頭６
銀，首掛當日最高都係５﹒９銀，而收市價更係全日最低４﹒６５銀，股價比起上市價唔見左
２２％，之後股價一路向下。到上個禮拜一（２６日），股價更加跌至上市新低１﹒３１銀，比
起上市價唔見左７８％。今早股價最高飆４９﹒６９％，但都係得２﹒４４銀，距離上市價６銀
仲差一大截，要返家鄉似乎遙遙無期。
講起嘀嗒出行，好多投資者容易混淆，當咗係出行平台龍頭滴滴出行。滴滴出行係目前內地
最大嘅出行平台，覆蓋內地大部分城市，提供快車，專車，出租車，順風車等服務。而嘀嗒出行
雖然都有出租車同順風車，但拼車服務更突出，為預算有限嘅客戶提供具競爭力嘅價格。至於業
績方面，撇除一次性公允價值變動，基本面無甚增長，好難支撐起今日股價嘅升幅。所以，就算
股價有炒作，要搵快錢都要謹慎，一唔小心接咗火棒就喊都無謂！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】中央接連推出惠港措拖，你認為是否能刺激香港經濟？► 立即投票
