樂齡KOL曾智華　賺錢賺健康

心靈富足篇：有快樂才有健康

　　投資穩健的藍籌好股，是Luke Sir的退休智慧，務求不用盯著股價賣出買入，畢竟退休為的是享受人生，做自己喜歡做的事。5年前他由港台高位退下來，組織了「慈善同學會」，「同學」均是過去電台和報章專欄的粉絲，現有300多人，有高級公務員、紀律部隊、律師、校長、廠家等來自各行各業。同學會每月舉辦旅行團、表演、晚宴等活動，為慈善機構籌款，寓慈善於玩樂，成立約5年已捐贈超過300萬元，受惠機構近40個。

慈善同學會每月也搞活動聚會，每次也笑聲不斷。

　　他慶幸退休後有「慈善同學會」的出現，既幫到人，也幫到自己，「我見到好多人退休之後不知所措，有前銀行高層朋友，有媒體高層的朋友，他們退休後突然間沒了工作，成個人好沉，以前（見面聚會）他們話題很多和工作機構有關，但現在唔知開邊瓣，有好大適應期。」若果退休生活不快樂，身體健康也很快會走下坡。故他認為退休人士，特別是男士，有必要建立人生下半場的目標，構建另一個「舞台」讓自己繼續表演。

　　「慈善同學會」可謂是Luke Sir退休後的「舞台」，記者早前參加了「慈善同學會」的晚宴聚會，除了Luke Sir做回「老本行」上台開咪，其他同學也會「搶咪」分享爆笑趣事，大夥兒嘻嘻哈哈度過一個晚上。「我用得最多時間在同學會，因為要諗好多活動令這幾百人好快樂，活動要做很多準備工作，聯絡、組織、場地、餐單、安排報名，但我做得好開心！」由獨樂樂到眾樂樂，難怪每次見到Luke Sir也是喜孜孜的，身體力行做到快樂退休。

讚年輕人質素高 香港未來感樂觀

　　早前iM專訪Luke Sir評論反修例風波的片段於網上爆紅，至今已有八十萬人次看過。他謙稱只是「我口講我心」，可惜「一巴星落去，星佢（林鄭）都唔醒」。反修例示威事態，在7月1日發展至佔領立法會，Luke Sir直言，反映「林鄭月娥政府完全失敗，拖冧成個香港！」

　　不論政治立場如何，看到當前事態發展，不少香港人也憂心忡忡，在當下環境，Luke Sir卻保持著樂觀心境：「人哋睇到啲衰，我睇到啲好！今次你見到原來咁多香港人好關心香港、愛香港，如果唔係都唔會有200萬人湧上街，係咪？咁熱，你估真係貪玩咩？第二，可見到年輕人質素其實好高，好多人以為香港年輕人係廢青、懶惰、無理想，現在睇到唔係！雖然佢哋嘅方法（衝擊行動）你未必同意，但佢哋願意為咗追尋社會公平公義付出很多。」

　　Luke Sir直言，大家可以不認同示威者的衝擊行動，但必須理解背後原因，「1萬人和平示威（林鄭月娥）唔理，100萬人和平示威唔理，200萬人和平示威唔理，到兩個人跳下來都唔理，係一個好冷血的特首令到市民憤怒，好多人用唔同方式發泄，其中後生仔覺得和平你唔理嘅話，我咪用啲激烈啲嘅手法。其實一半係迫上梁山，係迫出來，唔能夠單方面怪佢哋。如果林鄭月娥早啲回應市民，或者對市民唔好咁冷淡、冷感、冷血，係唔會去到這個情況！」

　　他續說，過去20年政治制度不公平，程序公義被摧毀，政府任意DQ（取消民選議員資格），今次反修例事件是最後一條藥引，將市民日積月累的怒火爆發出來，「點解衝擊立法會？唔衝擊維多利亞公園？係立法會有個Symbol喺度。因為過去20年立法會已經成為議會暴力為所欲為嘅場地，因為政府或權力已經將議會成為其統治的橫蠻工具，總之唔啱（心意）就DQ咗你，剩返啲舉手機器，想做乜舉手機器都會過，對香港人係好大侮辱！所以忍到咁上下時候就會爆，佢哋（示威者）摧毀嘅係橫蠻無理嘅機器，所以喺裡面發泄有象徵意義。當然佢哋都要付出，刑事毀壞要坐監，但大家不能忽略立法會係過去20年令到好多人，特別年輕人覺得唔公義嘅象徵。很多人連這些基本分析都無，剩係鬧年輕人，如果林鄭月娥作為領袖咁都唔知，認為自己無錯，認為自己啱晒，抵佢死！」

　　不過，Luke Sir對香港依然樂觀，「我相信世界運行是否極泰來，任何事衰到盡，好似股市咁會彈返高，今次好是見到原來有咁多市民關心社會，願意為社會付出，係好正面的訊息！」

乞兒心態 終生無憂

　　Luke Sir新書《有盈退休》的封面上，寫著「從一無所有，到身心富足、終生無憂！」他能夠自詡「終生無憂」，靠的不是億萬身家，而是「乞兒心態」。訪問當日，Luke Sir身上的T恤是UNIQLO百多元的款式，「退休生活要Back to Basic（回歸平淡），這件衫是UNIQLO、另一件貴少少是無印良品，也是百多元，生活水平不用很高，我自己是名牌，又何需著名牌！」

　　他隨即數一數自己衣食住行的花費，座駕只是日本車Suzuki，每天到茶餐廳食個早餐，中午食住家飯，晚上與友相聚才花多一點，要數花最多錢原來是看賽馬。「跑馬點可能有機會贏錢，一開閘已被馬會抽兩成做慈善、行政、納稅，能夠十場贏一場已偷笑，但我常常說，打乒乓波也要租枱，咁大場馬一千幾百人娛樂你，是付費娛樂，兼且透過它做善事，感覺好滿足！」

轉載自《iMONEY智富雜誌》

【你點睇】立會議員為趕赴酒會合照，在財會上快速通過87億撥款► 立即投票