RSS訂閱 創科(00669)今年是非不斷，2月狙擊完公司嘅沽空機構Jehoshaphat Research又發表報告，認為創科大規模欺詐佢嘅大客「家得寶」(Home Depot)至少有四年時間，報告寫到「隨住揭露呢個騙局，相關情況將會結束(Exposing this scam now will put an end to it)」，相信會令創科營業收入減少。Jehoshaphat Research指，會再次做空創科股票。
早前Jehoshaphat Research發表過沽空報告指，創科10幾年嚟通過操縱會計嚟誇大其利潤，從而設計完美利潤率趨勢線。機構又提到，喺全球收入超過10億美元嘅上市企業當中，創科係唯一可以連續十年間，毛利率每半年都可以上升嘅公司。
對於誇大利潤嘅指控，創科發公告澄清，強烈否認報告指控，該等指控包含眾多誹謗性、偏頗、斷章取義、唔準確同唔完整嘅陳述。集團對業務執行嚴格嘅內部監控，以確保財務報表嚴格遵守香港財務報告準則，真實同公平地反映財務狀況。
創科再次面對呢間沽空機構嘅狙擊，今日股價曾經跌超過5%，之後跌幅收窄番啲。睇番創科嘅日線圖，由今年2月初嘅年內高位109.6銀keep住回落，2月23日被狙擊後大插19.16%，股價走勢自此比較疲弱，5月18日起持續受制喺10同20天線。短期如果失守埋2020年2月反彈浪頂部65.3銀，可能比較麻煩喇。股價目前繼續尋底格局，無貨嘅朋友依家應該忍下手先！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇
