《魚缸博客》又話美國佬會搞惦晒？而家美股跌完到港股跌啦！

　　某登財經台經常有一句名言：放心啦，美國佬會搞惦晒啦。

　　早前聯儲局公布，息口維持不變，市場預計今年最多減息一至兩次。科技股首當其衝一路下跌，今日四隻領跌股份包括阿里（09988）、小米（01810）、比亞迪（01211）以及騰訊（00700）。美國佬搞唔搞惦我就唔知，但呢一刻港股就被人「搞惦左」啦。

　　其實港股跟跌，博客完全唔意外，睇返14日RSI，恒指由2月20日開始由80一路跌跌跌，博客都係個句：經濟環境同企業業績完全撐唔大市繼續升上去。

　　恒指呢隻牛由今年1月的19000點開始，直衝到今年高位24874，所謂不升則跌，連續三幾日都突破唔到25000呢個平台線，博客就知道升勢差唔多盡頭了。呢隻「肥牛」好歹都儲肥左三個月，而淡軍磨刀霍霍咁，業績期過埋就應該開刀，切開一片片做潮汕牛肉火鍋啦。

　　呢次回吐，關鍵位係大約22500呢個水平，即係向下睇仲有千幾點，但會唔會都守唔到呢？博客覺得防守性幾弱下，玩下手淡軍開多幾張大期，真係一路向下穿20000點都唔出奇。

　　到時，阿里巴巴，完啦；小米股價，完啦；騰訊股價，完啦；港股又跌，美股又跌，樓價又跌，跌跌跌跌跌。（即係咁講，博客都係想搞下GAG，《表姐你好嘢》啲對白唔知點解覺得好適合而家個股市）

《編者按》本欄搜羅即市傳聞，惟消息未經證實，《經濟通》亦不保證內容之準確性。