《魚缸博客》布魯可招股，有興趣可以入飛玩一兩手！

　　博客好少推介新股，因為近呢幾年新股都無咩肉食，扣埋手續費分分鐘輸轉頭有突都唔出奇。不過見識到泡泡瑪特嘅威力之後，博客終於相信「IP有價」呢樣東西，所以見到布魯可(00325)招股，都想玩下一兩手。

　　睇返招股書，布魯可有500多個的專利布局，原創IP能力，和與約50個知名IP的非獨家合作關係；其中公司的大部分收入來自基於奧特曼（超人）IP的產品銷售，於2023年及截至2024年6月30日止六個月分別佔收入的63.5%及57.4%。

　　所謂奧特曼即係我地細個睇個堆超人迪加、超人帝拿個堆系列（博客都大個仔了，唔知仲最新有超人乜乜，請見諒），不過我地呢代長大之後，已經有強大消費力，都會想買返細個無法得到嘅，如果泡泡瑪特係針對女性市場，咁布魯可就係針對我地呢班男性市場。中國人習慣，個女扭乜就未必買，但個仔扭計就一定買（客觀陳述，唔係針對女性），所以呢個消費市場極度龐大。

　　值得關注一點，公司已獲四間大孖沙認投，包括景林、UBS AM Singapore、富國投資者及富國基金，其實近期新股來講好少見，就博客經驗來講，有親大孖沙坐鎮就好少會跌穿招股價，畢竟呢個都係一種「信心保證」。

　　博客建議如果有興趣，可以抽一兩手玩下，分分鐘可以贏少少利事錢都唔出奇！

《編者按》本欄搜羅即市傳聞，惟消息未經證實，《經濟通》亦不保證內容之準確性。