《魚缸博客》雲頂新耀累升三成，創新藥企實現商業化盈利可吼

　　博客今日想同大家講講雲頂新耀-B(01952)，今日暫時已連升2日，累計升咗三成，破頂46.8銀。

　　噚日同今日嘅兩隻大陽燭，係因為炒起咗結腸炎藥獲本港衛生署許可上市。噚日雲頂新耀宣布，香港衛生署已經正式受理伊曲莫德嘅新藥上市許可申請，適應症係治療中重度活動性潰瘍性結腸炎嘅成人患者。雲頂新耀仲指出，伊曲莫德係歐盟第一個且唯一獲准用於16歲及以上患者嘅新一代口服治療潰瘍性結腸炎藥物，目前，呢隻藥已經陸續喺澳門、新加坡獲得新藥上市批准。

　　博客睇返其藥物研發，公司嘅製藥成果都幾唔錯，例如公司話，公司研發咗全球首個IgA腎病嘅對因治療藥物耐賦康，唔單止係全球首個亦係唯一一個獲得美國食品藥品監督管理局(FDA)批准嘅IgA腎病對因治療藥物，亦都係中國國家藥品監督管理局(NMPA)批准嘅內地首個及唯一嘅IgA腎病對因治療藥物。

　　而家公司有三款商業化產品，2024年已實現商業化層面盈利。公司本身具備研發能力，喺創新藥企中，依靠自身產品商業化嘅收入增長，相對依靠授權許可營收嘅公司更穩定。

　　雲頂新耀而家已經被炒高，RSI亦接近超賣區域70，短線較大可能會回調。如果睇好佢基本面，建議喺30銀，10月尾區間底部嘅支持位買入，上望前頂46.8銀。

《編者按》本欄搜羅即市傳聞，惟消息未經證實，《經濟通》亦不保證內容之準確性。