《魚缸博客》港股喺過去兩個星期五都因為天氣原因而停市，但如果望番恒指日線圖走勢，
你唔會覺得同天氣有關，但實情係有一定影響。如果你明知第二日好大機會無市，仲要係星期五
，咁就要考慮外圍會唔會有事發生，令港股走勢突變，揸住貨嘅就會平倉走人先，當然亦必定有
炒家鍾意博周末過後會裂口爆升，但我都係奉勸各位，面對不確定性都係減持或零持有安全，畢
竟依家港股唔係大牛市！
今日恒指裂口低開２６０點或跌１﹒４％，報１７９４１，之後進一步低見１７８４２先喘
定，臨近中午收市都仲未上番萬八點，似乎真要試番８月份低位１７５７３，做個雙底之後先有
機會大反彈！
雖然日日有股升，但宏觀整體基本面唔確定，都幾難有信心買落去。不過，今日搵到隻第一
太平（００１４２），股價最高升見３﹒３１銀，較上星期四有４﹒４％升幅，更係２０１８年
上半年以嚟最高。升啲咩？業績好囉！
集團截至２０２３年６月３０日止中期業績，股東應佔溢利３﹒４６億美金，按年大升
４３％，每股基本盈利８﹒１６美仙，派息１０﹒５港仙。期內，營業額增加６﹒７％至
５４﹒１１億美金。第一太平主要從事電訊、消費食品產品、地產及運輸，基建及天然資源業務
。其中最大收入來源Ｉｎｄｏｆｏｏｄ營業收入達３７﹒４１６億美金，對集團溢利貢獻
１﹒３７２億美金，中期息０﹒１０５港銀，依家預期周息率有７﹒３８５厘，都叫做高息，預
測市盈率只有３﹒２５倍。不過依家升到相對高位，建議等佢回番兩毫子，喺３﹒１銀先買啦，
呢隻股長期有息派，真係要ｓｅｔ止蝕位的話，失守２﹒５８銀先行動。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票
