《魚缸博客》大市氣氛改善，博恒大不如吼國藥

　　《魚缸博客》今日魚缸都算生番好多，恒指開波已經升超過５６２點，報１８５１９，升幅
超過３％，最高上過１８５６４，係咪可以維持落去仲係未知數。不過，依家係業績高峰期，最
近啲大價股，尤其係科企業績唔算差，對大市應有支持。
　　另一方面，恒大（０３３３３）今日復牌，同時公布截至６月３０日止中期業績，虧損
３３０﹒１２億人仔，較去年同期虧損６６３﹒５億人仔大幅收窄，每股虧損２﹒９７２銀人仔
，唔派中期股息。
　　不過，截至今年６月底止負債總額近２﹒４萬億人仔，剔除合約負債近６０４０億人仔後，
為１﹒７８萬億人仔。集團指，擁有土地儲備１﹒９億平方米，仲參與舊改項目７８個，目前營
運資金來源主要為各地政府提供嘅紓困資金借款、項目處置收入、存量監管資金及日常經營銷售
收入等。上半年銷售金額３３４﹒１３億人仔，銷售面積５１１﹒５萬平方米，累計銷售回款
２７１億人仔。
　　如果恒大ｋｅｅｐ住有資金回籠，又交到樓，時間或者可以解決債務問題。不過，今日恒大
開市就超過８６％，報兩毫二，暫時係全日低位，之後跌幅收窄到不足八成，但對於保守嘅投資
者嚟講，當然唔係入市時機。防人之心不可無，大復牌固然係因為臨近除牌死線，但股市嘅主要
作用係畀企業集資，加上蟹貨鬆綁，我估有唔少投資者都乘機走頭，是危是機自己諗喇。
　　短線不如吼下隻９月４日加入恒指成分股嘅國藥（０１０９９），集團截至２０２３年６月
底止中期盈利約４１億人仔，較去年同期升１１﹒１％，每股盈利１﹒３２人仔，一如以往唔派
中期息，但預期繼續派末期息。收入約３００９﹒５億人仔升１５﹒１％，毛利２３２﹒７億人
仔升７﹒５％。
　　今朝國藥最高升到２３﹒１銀，臨近上午收市仲升緊超過５％，技術上，２３至２５銀係主
要阻力，但有業績同染藍支持，加上整體市況似逐步改善，後市突破２５銀機會仍大，可以
２０﹒７銀止蝕吼位買，短期目標２５銀，中期望今年４月頂部２７﹒５５銀。（ｐｃ）　
　
　
　
《編者按》本欄搜羅即市傳聞，惟消息未經證實，《經濟通》亦不保證內容之準確性。