《魚缸博客》中升受惠汽車消費政策，技術走勢轉強中線上望３５銀

　　《魚缸博客》尋日港股係威係勢，恒指全日升３６６點或２﹒１％，報１８２１２，大市總
成交超過１０１５億元，算係近期表現最好，但今朝就低開１７４點，報１８０３７，但之後穿
過萬八關，低見１７９７５，之後喺１８０００邊徘徊。
　　技術上，恒指尋日彈穿條１０天線，但收唔到上去，今日轉番弱啲，鬼咩，尋晚美股三大指
數都跌超過１％，藉口又係話有聯儲局官員出嚟放鷹，美股確實處於相對高位，借勢急跌唔出奇
，而且呢幾日又召開環球央行年會，市場等緊聯儲局主席鮑威爾講話，反覆震盪就梗㗎啦！港股
已經謝晒，亦無基本面支持，日升日跌已經係投資者嘅日常，後市企番上去１８５００先有古講
。
　　依家揀股局住要追強勢股加業績好股份，唔好以為業績增長幾倍嗰啲好勁，皆因之前表現差
，低基數效應造成，即係好似香港啲賣樓數據咁，上周賣出一間，今周賣三間，就係升咗３倍，
好勁呀！弱勢股但業績好又點？股價弱自然有佢嘅原因，投資者會唔會因為一季嘅表現扭轉對佢
嘅睇法？大概唔會。所謂寧買當頭起，等佢出現多個技術性轉強訊號先考慮都唔遲，而蝕錢嘅股
票最好唔好買，皆因依家係跌市，唔係升市，買股唔使急。
　　中升（００８８１）呢隻車股可以博吓，基本面方面，截至今年６月３０日止中期純利
３０﹒０９億人仔，按年跌１２﹒８％；每股基本盈利１﹒２５３人仔，唔派中期息，但就年年
派末期息，依而周息率都有４﹒４５厘。中升係賣車嘅，有望受惠汽車消費政策，而且基本上唔
太受車廠之間嘅競爭影響，車價減？咪有機會賣多幾架囉！
　　技術上，股價過去三日守穩１０天線（２２﹒７１銀）樓上收，今日試衝２０天線
（２３﹒８１銀），一度升４﹒５％，高見２４﹒３銀，有轉勢跡象，從周線圖睇，今周有機會
形成穿頭破腳嘅陽燭收，預示股價已經喺２１﹒４５銀短線見底，可以等２３﹒６銀買，訂
２１﹒４銀止蝕，１０％風險，上望２７銀，中線望３５銀。（ｐｃ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。