《魚缸博客》好耐都未見過「８仔」會有討論消息，皆因隻惠陶集團（０８２３８）兩個幾
月炒高成十倍，然後又再高為３﹒８６大跌九成，真係一個經典教學案例，唔係叫大家買，而係
要學習！
正常股份，炒高炒低好正常，通常幾支陽又幾支陰，上上落落十個巴仙，呢類先叫健康炒上
落；但你留意隻惠陶集團，由五月尾開始，每日逐小逐小買，呈現四十五度升勢，之間又無大幅
上落，陰啲陰啲咁上，行內術語叫「搭棚」，我唔會話呢個係「唔健康」嘅升勢，只會話呢個係
「唔正常」嘅升勢。
咁你又會問，佢不停咁升，你點會知佢幾時大跌呢？通常呢類炒高散貨股份，係臨跌前幾日
，係會突然再炒高一兩支極大陽燭，當你見到呢類信號出現，就知道個莊家開始預備散貨，你就
好醒水啦！
呢種經典教學係旺市時期，真係日日向港股上演，不過而家港股一潭死水咁，就算有人想搭
棚都無錢入。不過有好多人藝高人膽大，成日都跟呢類莊家搵食，關鍵係你要知道「幾時散水」
，今日就講左一個最常見嘅散水特點，各位缸友得閒留意下係咪會咁啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
第九屆「傳媒轉型大獎」請投etnet經濟通一票！► 立即行動
