《小傳日記》打卡經濟盡在一杯？廉署賣咖啡想你不請自來！

　　《小傳日記》香江政府今年大搞盛事經濟，捉得著同胞鍾意打卡嘅心理，喺港九新界製造多
幾個打卡點，等同胞多行幾步就可以促進吓消費。不過乜嘢係「打卡ａｂｌｅ」呢一點都唔係咁
容易掌握，而廉署近期大搞「打卡經濟」，應該就幾成功「拿捏」。
　　廉政公署今年成立５０周年，除咗反貪嘅招牌，一直都講假如畀老廉拉去協助調查，期間都
會有杯熱辣辣又香噴噴嘅咖啡嚟招呼你。睇戲睇得多，無論市民定係遊客都對呢杯有助破案嘅「
啡後吐真言」非常好奇。
　　究竟廉記咖啡有咩特別？心動嘅朋友仔不妨馬上實行！廉署喺自己總部地下搞咗個「一九七
四咖啡廳」，今日正式開幕招待市民同遊客，雖然ｃｏｆｆｅｅ　ｓｈｏｐ係用廉署名義嚟開，
但其實係同保良局合作嘅社企，屬非牟利性質，每杯大約１２盎士大，都係賣２２銀一杯，相比
隔離嘅連鎖咖啡店，價位真係非常良心價。Ｃｏｆｆｅｅ　ｓｈｏｐ一共賣三款咖啡，分別來自
雲南、埃塞俄比亞同埋越南，廉署仲特別為三款豆改咗個「廉潔名」，分別係「清廉」、「保密
」同「『誠』果」，落單嗰陣就可以大叫「我要清廉！」
　　想要「清廉」不妨嗌多幾次，就好似廉署呢幾十年嚟宣揚反貪一樣，由過往「香港勝在有
ＩＣＡＣ」，到而家用到咖啡嚟吸引打卡，都係見證緊宣傳手法不斷演變嘅過程。近年不時見到
神州同胞一身「港風」裝扮到廉署總部打卡，放上小紅書分享，而有咗「一九七四」之後，大家
可以直接入去總部大樓，喺個超大咖啡裝置前面打卡，話題性十足。今日都真係有唔少人係遠道
而來幫襯廉署，有同胞話畀我哋聽，而家小紅書上已經開始有ｐｏｓｔ打卡廉署咖啡，而佢都係
專程嚟飲「頭啖啡」。
　　雖然今日都係第一日，但下晝去到落單一杯咖啡，排隊都已經２０分鐘有多，落單後都要等
多１５分鐘左右先整好，成個廉署地下大堂都係企滿人，真係夠晒熱鬧，廉署方面話，「一九七
四」首日已經賣咗超過３７０杯咖啡，仲有超過１０００人嚟到ｃｈｉｌｌ吓同打卡添。廉署又
同我哋提到，曾經有諗過喺大堂還原審訊室，令杯咖啡更加「原汁原味」，但最後想重視返反貪
教育，就寧願擺返多啲教育展品出嚟，對於筆者而言就留下少少遺憾囉！
　　打卡經濟唔易搞，但只是搞得好，就真係可以起到宣傳作用，正如廉署自己話齋，呢杯咖啡
與其「請」你嚟飲，不如吸引你自己嚟了解更加好！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。