《魚缸博客》以舊換新撐消費，比亞迪減價咩位抵？

　　《魚缸博客》今天期指結算，恒指走勢維持住個跌樣，自７月２５日以嚟，恒指四個交易日
有三日跌穿１７０００，即係話俾投資者聽，萬七絕對唔係強力支持！假設呢個判斷正確，咁就
大件事，恒指後市將會試落去１６０００。
　　投資者期望三中全會過後會有大規模刺激經濟措施出台，結果令人失望。即使近期內地推出
「以舊換新」措施，政府更加以３０００億人仔去支持，但要留意，據國家發展改革委副主任趙
辰昕所講，當中直接向地方安排約１５００億人仔超長期特別國債資金，去支持地方自主實施消
費品以舊換新，咁即係會令政府債務水平上升。
　　不過有證券行估計，以舊換新補貼金額或者超過４８０億人仔，但有望帶動約４８００億人
仔家電總銷售額，咁都算係政府出豉油、消費者出雞。不過，咁做明顯都係ｂｕｙ　ｔｉｍｅ，
唔可以持久，惟有等經濟逐步轉強。
　　內地電動車龍頭比亞迪（０１２１１），旗下方程豹７月２９日宣布品牌一周年煥新戰略，
「豹５」價格下調５萬人仔至２３﹒９８萬到３０﹒２８萬人仔。全球電動車市場競爭激烈都唔
係今日嘅事，我估比亞迪係想借住今次以舊換新措施，增加番多少收入。雖然話，你減得時佢又
減得，但最終都係睇吓邊個最多錢可以燒，比亞迪既然係龍頭，當然唔驚冇柴燒啦！
　　買股一定要買行業龍頭，「蔚小理」當中只有理想（０２０１５）有錢賺，但依家汽車業整
體經營環境轉差，無謂叉隻腳落去。股價走勢上，「蔚小理」沉曬底，博唔過。比亞迪今日亦跌
穿條５０天線（約２２９﹒８），雖然仍然處於今年２月初以嚟嘅上升趨勢，但已經勢危，肉眼
所見，起碼跌到２００銀先可以博，但到時２２０銀估計係反彈阻力。（ｐｃ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。