《魚缸博客》科技股跌到殘？騰訊穩陣啲，多間大行都唱好

　　《魚缸博客》真係羡慕死人！講緊阿朱仔（朱克伯格）因為手上持有的ＭＥＴＡ
（Ｆａｃｅｂｏｏｋ母公司），上季純利勁飆逾２倍，兼且宣布首次派股息，刺激股價上周五
（２日）急升逾兩成。唔單止帶動公司市值漲逾２０００億美金，阿朱仔帳面身家一日之內仲多
咗２８０億美金添。另外，單計股息就有１﹒７５億美金收，圍返港紙有成１４億銀，阿朱太係
華裔，老公荷包腫脹，唔知辦年貨會唔會鬆手啲？
　　查實上周五除咗阿朱間ＭＥＴＡ股價飆升之外，亞馬遜同日股價都大升近８％，唔係嘢少，
只因為ＭＥＴＡ風頭太勁，被掩蓋鋒芒。整體來講，美國的科技股股價近期不斷創新高，個個大
股東都身家暴漲。反觀香港呢邊既科技股，股價跌到阿媽都唔認得。唔單只大股東身家縮水，連
小散戶都遍體鱗傷。要好似ＭＥＴＡ咁股價飆兩成真係唔敢諗，只要可以生生性性，重納升軌，
已經阿彌陀佛啦。
　　上周五，國家新聞出版署發布２０２４年進口網絡遊戲版號名單，涉及共３２款遊戲獲批，
其中騰訊（００７００）取得兩款任天堂Ｓｗｉｔｃｈ遊戲位列其中，分別為《星之卡比新星同
盟》以及《太鼓之達人》。騰訊股價也跟住上，雖然之後因為恒指倒跌，騰訊股價升幅收窄，但
股價收市依然逆市升近３％，可以睇到市場對呢個消息反應正面。
　　從技術走勢圖睇，騰訊在上月低見２６０﹒２元後反覆向上。自上周五到今日，有滙證，麥
格理，野村，中金等多家大行唱好，目標價由３８５元至４７５元不等，與現價仍有一段距離。
可以諗諗佢，當然，任何時間投資都要定止蝕，以減低投資風險。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。