《小傳日記》年尾市魚缸企穩萬七，遊戲股若有所失！

　　《小傳日記》２０２３年魚缸好唔容易咁過完，呢個１２月都好唔容易，恒指見完一底又一
底，１２月第一日就再見今年新低，最衰嗰陣仲連１６０００都穿過！好在見過１５９７２之後
就證明１６０００真係見底，下半個月起大部分時間都一路反彈。
　　呢個１２月外圍就好高興，聯儲局一開始放鴿，美股就忍唔住爆上。恒指一底又一底，道指
就一頂又一頂，睇到魚缸呢邊幾唏噓！食住美股個勢，大隻而又無返來ＡＨ股上市嘅中概股拼多
多都受惠唔少，一來少咁重沽壓，二來拼多多第三季收入比起預期多咗成１４０億人仔，好到震
驚中外孖屐，比起ＡＴＭ仲喺泥潭中掙扎，資金索性轉吼落拼多多，拼多多連升幾日，市值更加
一度超越巴巴（０９９８８），成為美國上市最大市值中概股。
　　電商嘅後起之秀普遍都省鏡得多，除咗拼多多，東方甄選（０１７９７）今年嘅成績都穩定
得多，不過今個月就是非一籮籮。事緣東方甄選台柱董宇輝以才子形象聞名，一場直播就掀起董
宇輝粉絲「丈母娘」再次質疑董宇輝嘅待遇唔夠好，發起集體脫粉東方甄選，禍連股價都跌咗一
成有多，偏偏內部下至小編，上至ＣＥＯ孫東旭，都撲火不力，最後要出動俞敏洪親自接任
ＣＥＯ，將董宇輝升做「高級合伙人」，而被害視為打壓董宇輝嘅最大力量孫東旭，先係無咗
ＣＥＯ個位再轉為非執董，最後連非執董都辭任埋，先平息到呢場「關公」災難。
　　原本以為今個月焦點都係東方甄選，點知到年尾都仲會有「大禮」。做冬當日兼夾聖誕前夕
，魚缸個個都ｈｏｉｌｄａｙ　ｍｏｏｄ之際，忽然阿爺公布「徵求意見稿」，話唔准遊戲提供
「每日登入」等等嘅誘導性獎勵，要為用戶提供儲值限額，同時遊戲存儲設備一定要儲放喺神州
境內。總知就係一堆孖屐認為極度不利遊戲公司嘅措施，龍頭網易（０９９９９）當日最多試過
暴瀉差唔多三成，幾乎嘔突全年升幅，ＱＱ（００７００）全日都唔見一成二。雖然事後官媒放
風話仲有得傾，不過兩隻遊戲龍頭股到今日年結都升唔返出事前嘅價位。
　　今個１２月結果都係大把事發生，好在最終今日都保住１７０００大關收市，算係為
２０２３年收個好尾啦，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。