《小傳日記》網易暴雪難捨難離！ＣＥＯ走人出年復合可期？

　　《小傳日記》本身臨到年尾，大家ｈｏｉｌｄａｙ　ｍｏｏｄ都已經無心戀戰，不過多得阿
爺上個禮拜五嘅「大禮」，遊戲股暴跌，ＱＱ（００７００）都要勁跌，累到魚缸都要跟住落。
其中網易（０９９９９）係今次嘅重災區，上個禮拜五要暴跌兩成半。股價深插，就係時候要有
「好料」，咁啱呢個聖誕ｗｅｅｋｅｎｄ就傳同暴雪來個「世紀復合」。
　　「復合」、「舊情復熾」、「再續前緣」或者「重燃愛火」，中港缸邊媒體用盡「浪漫」嘅
辭彙去形容網易同暴雪有機會嘅重新合作。雖然矯情，不過都證明到孖屐係點睇呢兩間中資同外
資公司嘅關係，本來就係天生一對。自網易２００８年開始代理暴雪嘅《星海爭霸ＩＩ》，網易
嘅崛起同暴雪都係息息相關。去到２０２２年，暴雪旗下多隻遊戲都由網易代理，當兩間公司停
止合作，《魔獸世界》、《爐石戰記》等等大熱遊戲都要停服，一時令到網易股價處於低谷。
　　分開呢一年來，你有你嘅生活，我繼續有我嘅忙碌，雖然網易代理嘅暴雪遊戲停服，不過過
去呢幾季網易成績表一直都唔錯，當然股價都有反映，唔計監管消息爆出之前，網易全年升差唔
多五成。
　　而暴雪方面，經歷多方斡旋，到今年１０月底微軟宣布終於獲得英國競爭和市場管理局通過
，意味微軟終於解決所有難關，正式以６９０億美金收購暴雪。收購完成之後，做咗３２年嘅暴
雪ＣＥＯ　Ｂｏｂｂｙ　Ｋｏｔｉｃｋ都準備功成身退，過兩日就會係ｌａｓｔ　ｄａｙ。不過
有傳網易內部員工一路最不滿就係Ｋｏｔｉｃｋ，當佢執包袱走人，網易暴雪就出現復合消息，
唔排除當日Ｋｏｔｉｃｋ就係「捧打鴛鴦」嘅主力。
　　２０２３年都就快過，靠自己嘅網易最終都係敵唔過監管之手，跌落谷底之際得到舊情人驀
然回首，畀我係網易就死都拿返住條救命繩，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。